Ծառայակցին անզգուշությամբ կյանքից զրկած զինծառայողը կալանավորվել է
ԻՐԱՎՈՒՆՔ
ՀՀ քննչական կոմիտեի զինվորական քննչական գլխավոր վարչության իններորդ կայազորային քննչական բաժնում շարունակվում է զինծառայողի կողմից ծառայակցին` Վ. Հովսեփյանին մահացու հրազենային վիրավորում պատճառելու դեպքի առթիվ նախաձեռնված քրեական վարույթի նախաքննությունը:
Ինչպես տեղեկացնում է Քննչական կոմիտեն, 2022թ. նոյեմբերի 15-ին՝ ժամը 03։20-ի սահմանում, ՀՀ ՊՆ N զորամասի պահպանության տեղամասի մարտական դիրքում պարտադիր ժամկետային շարքային զինծառայողը «АК-103» տեսակի ինքնաձիգից կրակահերթ էր արձակել, որի հետեւանքով դիրքի ավագ, շարքային Վ. Հովսեփյանը ստացել էր հրազենային վիրավորում եւ հիվանդանոց տեղափոխվելու ճանապարհին մահացել։
Ձեռք բերված բավարար ապացույցների համակցությամբ՝ ժամկետային շարքային զինծառայողին մեղադրանք է ներկայացվել՝ ՀՀ քրեական օրենսգրքի 540-րդ հոդվածի 6-րդ մասով, եւ որպես խափանման միջոց նրա նկատմաբ ընտրվել է կալանավորումը:
Նախաքննությունը շարունակվում է:
