Դանակահարություն Վարդաշենում. 42–ամյա Սամվելը հիվանդանոցում մահացել է
ԻՐԱՎՈՒՆՔ
Փետրվարի 13-ին, ժամը 1.20-ին, հիվանդանոցից ոստիկանության Էրեբունու բաժնում հաղորդում է ստացվել, որ ազդրի եւ հետույքի կտրած-ծակած վերքերով բուժօգնության է տեղափոխվել 42-ամյա Սամվել Սահակյանը, որը, ըստ բժշկի տեղեկանքի, ի վիճակի չի եղել հաղորդում տալու:
Ոստիկանության մամուլի ծառայությունից հայտնում են, որ ոստիկանության քրեական հետախուզության գլխավոր վարչության եւ Էրեբունու բաժնի ծառայողները պարզել են, որ փետրվարի 13-ին, ժամը 1-ի սահմաններում, Երեւան քաղաքի Վարդաշենի 12 փողոցում, վիճաբանության ընթացքում, 31-ամյա Աբրահամ Ա.-ն դանակով հարվածներ է հասցրել Սահակյանին:
Աբրահամ Ա.-ն ժամը 6.30-ին Վարդաշենի 12 փողոցից բերման է ենթարկվել ոստիկանության Էրեբունու բաժին եւ տվել խոստովանական բացատրություն:
Սամվել Սահակյանը ժամը 8.20-ի սահմաններում, գիտակցության չգալով, հիվանդանոցում մահացել է:
Կատարվում է քննություն:
