«Միրզայան. Նիկոլ Փաշինյանը պաշտպանում է ոչ թե Հայաստանի, այլ իր արևմտյան գործընկերների և ընկերների շահերը»
ՎԵՐԼՈՒԾՈՒԹՅՈՒՆՆԵՐ
Publico.ru–ն գրում է, որ Հայաստանի կառավարությունն արգելել է «Россия Сегодня» մեդիա խմբի և RT հեռուստաալիքի գլխավոր խմբագիր Մարգարիտա Սիմոնյանի և Պետդումայի ԱՊՀ հարցերով հանձնաժողովի առաջին տեղակալ Կոնստանտին Զատուլինի մուտքը Հայաստան: Այդ մասին ինքը՝ Սիմոնյանը, հայտնել է իր հեռագրային ալիքում։
«Երկար տարիներ Հայաստանին կատաղի աջակցություն ցուցաբերող Կոնստանտին Զատուլինին Հայաստանի գործող ղեկավարն արգելել է մուտք գործել Հայաստան։ Ի դեպ, ինձ նույնպես։ էլ ի՞նչ ասես»,- գրել է RT-ի ղեկավարը։
Քաղաքագետ, Ռուսաստանի Դաշնության կառավարությանն առընթեր Ֆինանսական համալսարանի դոցենտ Գևորգ Միրզայանը, հատուկ PublicO-ի համար մեկնաբանել է ստեղծված իրավիճակը. «Կոնստանտին Զատուլինն իսկապես հաճախ էր քննադատում վարչապետ Նիկոլ Փաշինյանի գործունեությունը։ Սակայն, միևնույն ժամանակ, նա համարվում է Հայաստանի շահերի ռուս կարևորագույն պաշտպաններից մեկը, ով ինչպես և շատ այլ պաշտպաններ, ինչպես նաև Ռուսաստանի Դաշնությունում հայկական սփյուռքի ներկայացուցիչներ, շատ հստակ տարանջատում են Փաշինյանին Հայաստանից։ Ռուսական փորձագիտական հանրության շրջանում (ինչպես սփյուռքի ներկայացուցիչների, այնպես էլ ռուս մասնագետների) հստակ պատկերացում է առաջացել, որ Նիկոլ Փաշինյանը պաշտպանում է ոչ թե Հայաստանի, այլ իր արևմտյան գործընկերների և ընկերների շահերը, որոնք կողմ են Հայաստանը Ռուսաստանից պոկելուն։
Այսպես, օրինակ, հիմա Հայաստանը գնում է դեպի շատ սերտ մերձեցում արևմտյան երկրների, առաջին հերթին Ֆրանսիայի ու ԱՄՆ-ի հետ։ Փաշինյանը և նրա շրջապատը դա անում են այն պատրվակով, որ Մոսկվան չի կատարել դաշնակցային պարտավորությունները Երևանի հանդեպ Հայաստանի ու Ադրբեջանի միջև ռազմական հակամարտության վերջին սրման ժամանակ։ Այդ իսկ պատճառով Հայաստան են հրավիրվում արևմտյան դիտորդներ, իսկ հայ քաղաքական գործիչները շրջում են արևմտյան երկրներում հավատարմության և երկկողմ համագործակցության հեռանկարների երաշխիքներ տալով»:
Նյութը հրապարակման պատրաստեց Կամո Խաչիկյանը
