«Հայաստանը խաղում է իրավիճակը բարդացնելու վրա». քաղաքագետը բացատրել է Ֆրանսիայի ակտիվությունը ղարաբաղյան կարգավորման հարցում
ՎԵՐԼՈՒԾՈՒԹՅՈՒՆՆԵՐ
info24.ru-ն գրում է, որ Ադրբեջանի նախագահ Իլհամ Ալիևի հանդիպումը Ֆրանսիայի առաջնորդ Էմանուել Մակրոնի կաբինետի խորհրդական Իզաբել Դյումոնի հետ վկայում է այն մասին, որ Փարիզը որոշել է ակտիվացնել ջանքերը հայ-ադրբեջանական կարգավորման հարցում։ Այս մասին Info24-ին հայտնել է Մերձավոր Արեւելք-Կովկաս հետազոտական կենտրոնի տնօրեն Ստանիսլավ Տարասովը։ Նա հիշեցրել է, որ վերջերս Հայաստանի վարչապետ Նիկոլ Փաշինյանը այցով եղել է Փարիզում և Ելիսեյան պալատում բանակցություններ է վարել Ֆրանսիայի նախագահի հետ։
Փորձագետի խոսքով, հայկական կողմը հանդես է եկել Ադրբեջանի հետ խաղաղության պայմանագրի նախապատրաստման նոր հայեցակարգի օգտին, սահմանել սահմանային նոր պարամետրեր և, հաշվի առնելով շփման գծում վերջին սրացումը, Ֆրանսիային կոչ է արել ակտիվացնել դիվանագիտական գործունեությունը։ Եվ դա պայմանավորված է նրանով, որ Ֆրանսիան այժմ նախագահում է ՄԱԿ-ի Անվտանգության խորհուրդը, և հայկական կողմը հույս ուներ, որ այդ խնդիրը կբերվի Անվտանգության խորհրդի նիստին։ Մակրոնը, ընդհանուր առմամբ, խոստացել է, իսկապես կապվել է Ալիևի հետ, այժմ խորհրդակցություններ են ընթանում խորհրդականների մակարդակով, հայտարարել է Տարասովը։
Դրանով, ըստ նրա, ավարտվում է Ֆրանսիայի դիվանագիտական գործունեությունը, քանի որ պարզ չէ, թե այս դեպքում ինչ կարգավիճակով է գործում Փարիզը։ Ֆրանսիան փլուզված ԵԱՀԿ Մինսկի խմբի անդամ է: Եթե նա հանդես է գալիս որպես ԵԱՀԿ Մինսկի խումբ, ապա Ադրբեջանը այդ առաքելությունը ունակ չի համարում։ Եթե նա հանդես է գալիս որպես անկախ մոդերատոր, դա հուշում է, որ նա ունի կարգավորման իր սեփական հայեցակարգը: Բայց առանց Ռուսաստանի ոչինչ չեն կարող լուծել, համոզված է քաղաքագետը։
Տարասովի խոսքով, հայ-ադրբեջանական հաշտության պայմանագրի նախապատրաստման ներկայիս բանակցային գործընթացը հիմնված է 2020 թվականի նոյեմբերի 9-ի եռակողմ համաձայնագրերի վրա, որոնք վերջ դրեցին ղարաբաղյան պատերազմին։ Ըստ այդմ, Ռուսաստանին դրանից դուրս մղել հնարավոր չէ, համենայնդեպս, դա Բաքվին չի հետաքրքրում։
Ադրբեջանի դիրքորոշումն ավելի տրամաբանական է կառուցված, նա փորձում է կոնսոլիդացնել եռակողմ պայմանավորվածությունների արդյունքը և այն վերածել ինչ որ կայուն միջազգային համաձայնագրի, որը կպահպանի ստատուս քվոն, պարզաբանել է քաղաքագետը։ Տարասովը նշել է, որ Ադրբեջանը «ի վերջո լուծել է իր պատմական խնդիրը՝ իր վերահսկողության տակ է վերադարձրել տարածքները, և 2020 թվականի նոյեմբերի 9-ի պայմանավորվածությունները միանգամայն բավարարում են իրեն», հետևաբար նա «դեռևս մոսկովյան բանակցային գործընթացի կողմնակիցն է», թեև «դա անում է չխուսափելով Արևմուտքի հետ շփումներից»։
Բայց Երևանը, ըստ փորձագետի, իր արևմտյան գործընկերների օգնությամբ փորձում է կարգավորման նոր մոտեցում ներդնել ԵԱՀԿ Մինսկի խմբի վերակենդանացման միջոցով։ «Այդ ամենը խոսում է այն մասին, որ Հայաստանը խաղում է հակամարտության գոտում իրավիճակը բարդացնելու ուղղությամբ»,- ամփոփել է Տարասովը։
Նյութը հրապարակման պատրաստեց Կամո Խաչիկյանը
