Կտեսնենք՝ սիոնիստական ռեժիմից որևէ բան կմնա՞, թե՞ ոչ. Իրանի նախագահը սպառնացել է Իսրայելին
ՄԻՋԱԶԳԱՅԻՆ
Իրանի նախագահ Էբրահիմ Ռաիսին հայտարարել է, որ եթե Իսրայելն Իսլամական Հանրապետության դեմ գործելու որոշում կայացնի, «իր ծրագիրն իրականացնելու համար բավական ժամանակ չի ունենա, քանի որ երկրից որևէ բան չի մնա», գրում է iranintl.com-ը։
Երկուշաբթի կայացած մամուլի ասուլիսի ժամանակ Ռաիսին նշել է, որ Իսրայելն ի սկզբանե չէր ցանկանում, որ Իրանը ձեռք բերի միջուկային տեխնոլոգիա, «սակայն այդ գիտելիքը մեր երկրի համար ազգային է դարձել, և այն չի կարող խլվել մեզանից»։
Ռաիսին ասել է, որ եթե Իսրայելը որոշի իրականացնել Իրանի միջուկային ծրագիրը ոչնչացնելու իր սպառնալիքները, «նրանք կտեսնեն՝ սիոնիստական ռեժիմից որևէ բան կմնա՞, թե՞ ոչ»:
Անդրադառնալով Իրանի 2015 թվականին կնքված միջուկային համաձայնագրին վերադառնալու հարցում Արևմուտքին հետ մղելու Իսրայելի ջանքերին, Ռաիսին նշել է, որ Իսրայելի ջանքերն ի վերջո ապարդյուն կանցնեն:
Իրանի նախագահի խոսքով՝ «իրանցի միջուկային գիտնականների սպանությունը, բազմաթիվ դիվերսիոն գործողությունները միջուկային ծրագրի դադարեցման համար էին:
Իսրայելն ուզում էր կանգնեցնել մեզ, բայց մենք կանգ չառանք. Նրանք մեզ չեն կանգնեցնի և չեն կարող մեզ հետ պահել այս բացարձակ իրավունքից», - շեշտել է Իրանի նախագահը:
Հիշեցնենք, որ նախօրեին հրեական պետության վարչապետ Յաիր Լապիդը, մեկնաբանելով Իրանի միջուկային ծրագրի շուրջ Գործողությունների համատեղ համապարփակ ծրագրի (ԳՀՀԾ) հնարավոր վերականգնման շուրջ ստեղծված իրավիճակը, հայտնել է, որ Իսրայելի պաշտպանության բանակին և հետախուզությանը՝ «Մոսադ»-ին, հանձնարարվել է պատրաստվել Իրանի վերաբերյալ ցանկացած սցենարի։
«Իսրայելի պաշտպանության ուժերը և «Մոսադ»-ը հրահանգներ են ստացել մեզնից՝ պատրաստվելու ցանկացած սցենարի, մենք պատրաստ կլինենք գործել Իսրայելի անվտանգությունը պահպանելու համար։ Սա հասկանում են ամերիկացիները, սա հասկանում է ողջ աշխարհը, սա պետք է իմանա նաև Իսրայելի հանրությունը»,- գրել էր վարչապետը Twitter-ի իր էջում։
Լապիդը ևս մեկ անգամ ընդգծել էր, որ Իսրայելը դեմ է ԳՀՀԾ-ի ներկայիս տեսքով վերականգնմանը։
«Այն վատ համաձայնագիր է, այն արդեն վատն էր, երբ ստորագրվեց 2015 թվականին, այսօր դրանից բխող վտանգներն ավելի են մեծացել։ Այն մոտ է ավարտման ժամկետին, իսկ Իրանը տեխնոլոգիաների զարգացման առումով այլ վիճակում է»,- ասել էր նա։
Իսրայելի վարչապետի խոսքով՝ իր երկրի գլխավոր առաջնահերթությունն ի սկզբանե եղել է իրանական միջուկային ծրագրի շուրջ գործարքին դեմ հանդես գալը:
«Մեր քաղաքական ուղղությունն առաջին իսկ օրվանից՝ պայքարել այս համաձայնագրի դեմ մեր ողջ ուժով, բայց չվնասելով ԱՄՆ-ի հետ մեր ռազմավարական հարաբերություններին»,- ասել է Լապիդը։
Իրանն իր միջուկային ծրագրի ակտիվ զարգացումը սկսել է նախկին նախագահ Մահմուդ Ահմադինեժադի նախագահության տարիներին (2005-2013 թվական)։ Միևնույն ժամանակ ՄԱԳԱՏԷ-ն մշտական ստուգումներ էր սկսել Իրանի միջուկային օբյեկտներում, որը վերջին հաշվով հաստատեց իրանցիների կողմից միջուկային զենքի ստեղծման աշխատանքները։ Այդ ժամանակ, ի պատասխան Իրանի գործողությունների, ԱՄՆ-ն ու Եվրոպական երկրները պատժամիջոցներ սկսեցին սահմանել Իրանի ֆինանսական հատվածի, էներգառեսուրսների և զինամթերքի արտահանման վրա։ Արդյունքում, իրանական տնտեսությունն էականորեն տուժեց։
Իրավիճակը որոշակիորեն կարգավորվեց 2015 թվականին՝ Հասան Ռոհանիի կառավարության ջանքերի շնորհիվ։ Մեծ Բրիտանիան, Գերմանիան, Չինաստանը, Ռուսաստանը, ԱՄՆ-ն, Ֆրանսիան ու Իրանը կնքեցին Համատեղ համապարփակ գործողությունների ծրագիրը։ Թեհրանը սահմանափակեց իր միջուկային ծրագիրը, իսկ նրա վրայից հանվեցին պատժամիջոցները։ Սակայն 2018 թվականի մայիսին ԱՄՆ-ն դուրս եկավ գործարքից և վերականգնեց Իրանի նկատմամբ պատժամիջոցները։ Ի պատասխան Թեհրանը հայտարարեց համաձայնագրի շրջանակներում իր պարտավորությունների աստիճանական կրճատման մասին։
Ուրբաթ ՄԱԳԱՏԷ-ի գլխավոր տնօրեն Ռաֆայել Գրոսսին ասել է, որ Իրանի միջուկային ծրագրի շուրջ համաձայնության հասնելն ավելի մոտ է, քան երբևէ։ Նույն օրը Bloomberg-ը, հղում անելով իր աղբյուրներին, հայտնել է, որ ԱՄՆ-ի և Իրանի միջև ԳՀՀԾ-ի վերականգնման շուրջ համաձայնությունը կարող է ձեռք բերվել մի քանի շաբաթվա ընթացքում։
Իսրայելի իշխանությունները բազմիցս դեմ են արտահայտվել Իրանի հետ նոր գործարքին: Նա բազմիցս ընդգծել է, որ Իսրայելը Թեհրանի հետ հնարավոր համաձայնագիրը չի համարի իրավաբանորեն պարտավորեցնող և կշարունակի ամբողջ ուժով դեմ լինել Թեհրանի միջուկային ծրագրին, նույնիսկ եթե նոր գործարք կնքվի:
