Ելենովկայի ուղղությամբ հրթիռային հարվածը հանցագործությունները թաքցնելու փորձ է. Շոյգու

 ՌԴ պաշտպանության նախարար Սերգեյ Շոյգուն հայտարարել է, որ «Ազով» (ճանաչվել է ահաբեկչական կազմակերպություն և արգելված է ՌԴ-ում) ահաբեկչական գումարտակի գերեվարված զինյալների` Ելենովկայում գտնվող մեկուսարանին ուկրաինացի զինվորականների հասցրած հրթիռային հարվածը հանցագործությունների մասին ճշմարտությունը թաքցնելու փորձ է:

Նրա խոսքով՝ ծայրահեղական ազգայնականությունը, որը տարածում էր «Ազով» գումարտակը, ամբողջ բանդերովյան Ուկրաինայի գաղափարախոսությունն է դարձել։

«Այսօր Ուկրաինայի զինված ուժերի լքած դիրքերում ՌԴ զինծառայողները մեծ քանակությամբ ծայրահեղական գրականություն են գտնում։ Կոնգրեսի մասնակիցները կկարողանան դրա նմուշները տեսնել ուկրաինացի ազգայնականների կողմից օգտագործվող սպառազինության, ռազմական տեխնիկայի և ապահովման միջոցների թեմատիկ ցուցահանդեսում»,- ասել է պաշտպանության նախարարը:

Նա հավելել է` Ուկրաինայի բազմաթիվ բնակիչներ չեն ընդունում Կիևի իշխանությունների քաղաքականությունը, որն ուղղված է նացիզմի վերականգնմանը, Ռուսաստանի հետ կապված ամեն ինչի հանդեպ ատելության բորբոքմանը։

«Առանձին խոսակցության թեմա է նեոնացիզմը Ուկրաինայում։ Պաշտոնական Կիևը բացեիբաց հայտարարել է, որ ազգայնականների ժառանգորդն է ու նրանց գործի շարունակողը։

Գերագույն ռադան ազգային անկախության մարտիկներ է հռչակել ОУН-УПА-ի գրոհայիններին («Ուկրաինացի ազգայնականների միություն - Ուկրաինական ապստամբության բանակ», ծայրահեղական կազմակերպություն, արգելված է ՌԴ-ում՝ խմբ.)։ Խորհրդային Միության փլուզումից հետո Վաշինգտոնում ամեն ինչ արել են Ուկրաինան Ռուսաստանի հակոտնյա դարձնելու համար։ Խրախուսվել է օրենսդրության առաջխաղացումը, որն արգելում է ռուսերենը, ռուսական լրատվամիջոցները, ռուսական մշակույթը՝ այն ամենը, ինչը կապված է մեր երկրի հետ»,- ասել է Շոյգուն։

Նա ընդգծել է, որ նման քաղաքականությունը չընդունողների դեմ դաժան պատժիչ գործողություն է ծավալվել։ Իսկ ռազմական հատուկ գործողություն անցկացնելու որոշումն ընդունվել է Ռուսաստանի անվտանգության նկատմամբ անընդունելի սպառնալիքների պատճառով, որոնք ստեղծվել էին Ուկրաինայի իշխանությունների կողմից:

«Ութ տարի շարունակ Կիևի ռեժիմը աղաղակող հանցագործություններ է կատարել ԴԺՀ-ի և ԼԺՀ-ի քաղաքացիների նկատմամբ։ Հազարավոր անմեղ մարդիկ են զոհվել, այդ թվում՝ երեխաներ։ Միաժամանակ սկսվել էր Հյուսիսատլանտյան դաշինքի կողմից ուկրաինական տարածքի ռազմական յուրացումը։ Կիևը ՆԱՏՕ-ին անդամակցելու ուղղություն էր վերցրել»,- ասել է նա։

ՌԴ պաշտպանության նախարարը նշել է, որ հատուկ գործողության առաջին իսկ օրերին ռուսական զինված ուժերը բախվել են ուկրաինական կազմավորումների անմարդկային մարտավարությանը:

«Ուկրաինայի զինված ուժերի և ազգային գումարտակների զինվորները թաքնվում են քաղաքային թաղամասերում, խաղաղ բնակչության հետևում՝ նրանց դարձնելով կենդանի վահան, թե՛ բնակելի տները, թե՛ սոցիալական ու էներգետիկ ենթակառուցվածքների օբյեկտներն օգտագործում են որպես ամրաշրջաններ և կրակային կետեր։ «Ցամաքում» պարտվելով և նահանջելով՝ նրանք նպատակաուղղված ոչնչացնում են իրենց շուրջն ամեն ինչ, միայն թե խաղաղ քաղաքացիներին ոչինչ չմնա։ Հայրենական մեծ պատերազմի ժամանակ նույնպիսի մարտավարություն էին որդեգրել նաև գերմանացի նացիստները»,-ասել է ՌԴ պաշտպանության նախարարը։

Դա, ըստ նրա, մասամբ բացատրվում է ուկրաինական բանակի կազմով։ Հակասահմանադրական հեղաշրջումից հետո երկրում ի հայտ եկան նոր ուժային կառույցներ՝ այսպես կոչված ազգային գումարտակներ, որոնք դավանում են նեոնացիզմի գաղափարը, ռասայական անհանդուրժողականությունը բոլոր նրանց հանդեպ, ում նրանք ուկրաինացիներ չեն համարում։