Քաղաքագետ. Հայաստանում ստեղծելով Ազգային գվարդիա իշխանությունները փորձում են պաշտպանվել
ՔԱՂԱՔԱԿԱՆՈՒԹՅՈՒՆ
Regnum.ru-ն գրում է, որ Հայաստանի ուժային կառույցների նախատեսվող բարեփոխումները պայմանավորված են Հայաստանի իշխանությունների պաշտպանվելու ցանկությամբ։ Այդ մասին REGNUM-ի թղթակցին ասել է քաղաքագետ, «Ժողովրդի ձայնը» (Հայաստան) փորձագիտական ակումբի անդամ Արման Ղուկասյանը։
«Հայաստանում միայն աշնանն է նախատեսվում ստեղծել Ներքին գործերի նախարարություն, որն այժմ երկրում չկա։ Ազգային գվարդիան լինելու է ներքին գործերի նախարարության ենթակայության տակ: Ազգային գվարդիայի գործառույթներն են լինելու հասարակական կարգի, հասարակական անվտանգության պահպանումը, պետական մարմինների, բարձրաստիճան պաշտոնյաների և կարևոր օբյեկտների անվտանգության ապահովումը։ Նաև Ազգային գվարդիան կներգրավվի ռազմական դրության և արտակարգ դրություն հայտարարելու դեպքում օրենքի գերակայության ապահովման գործում։ Այժմ այդ գործառույթները կատարում են ոստիկանության տարբեր ստորաբաժանումներ ու ուժային այլ կառույցները, իսկ Ազգային գվարդիայի դեպքում նախատեսվում է այդ ամենը կենտրոնացնել մեկ տեղում։ Այն թե ի՞նչ կլինի արդյունքը, կտեսնենք։ Սա քաղաքական որոշում է, որի հետևում կա քաղաքական շահ։ Ուժային բլոկի ուժեղացումը, իմ կարծիքով, պայմանավորված է նրանով, որ իշխանությունները ցանկանում են ավելի ինտենսիվ ապահովել իրենց քաղաքական իշխանությունը»,- ասել է փորձագետը։
Հիշեցնենք, որ Հայաստանում ոստիկանական ուժերի բարեփոխման արդյունքում նախատեսվում է ստեղծել Ներքին գործերի նախարարություն, իսկ ոստիկանական ուժերի ու պետանվտանգության վարչության հիման վրա ազգային գվարդիա:
Նյութը հրապարակման պատրաստեց Կամո Խաչիկյանը
