Ո՞վ կփոխարինի Ջոնսոնին Մեծ Բրիտանիայի վարչապետի պաշտոնում
ՄԻՋԱԶԳԱՅԻՆ
Բորիս Ջոնսոնի հրաժարականից հետո Մեծ Բրիտանիայի վարչապետի պաշտոնի համար պայքարն արդեն սկսվել է։
Ջոնսոնը հրաժարական տվեց Պահպանողական կուսակցության ղեկավարի պաշտոնից՝ ենթարկվելով հսկայական քաղաքական ճնշման՝ կառավարության անդամների հրաժարականների աննախադեպ ալիքից եւ նախարարների կաբինետի ապստամբությունից հետո:
«Սրանք ընդմիջումներ են»,- ասել է Ջոնսոնը՝ դիմելով բրիտանական հանրությանը Դաունինգ սթրիթից դուրս: Նա հավելել է, որ «տխուր է հրաժարվել աշխարհի լավագույն աշխատանքից» եւ խոստովանել է, որ քաղաքականության մեջ «ոչ ոք անփոխարինելի չէ»։
Լոնդոնի 58-ամյա նախկին քաղաքապետն ասել է, որ մտադիր է մնալ վարչապետի ժամանակավոր պաշտոնատար, քանի դեռ իրավահաջորդը չի ընտրվել՝ անտեսելով անհապաղ հրաժարական տալու քաղաքական ողջ սպեկտրի, այդ թվում՝ իր կուսակցության որոշ անդամների կոչերը, հայտնում է CNBC-ն։
Ջոնսոնի քննադատները պնդում են, որ նա պետք է որքան հնարավոր է շուտ դուրս մղվի, իսկ պարտականություններն առայժմ կատարի փոխվարչապետ Դոմինիկ Ռաաբը: Սակայն թորիների այլ օրենսդիրներ պնդում են, որ Ջոնսոնի փոխարինումը կարող է ավելի շատ անկայունություն առաջացնել՝ ասելով, որ Ջոնսոնը պետք է մնա իր պաշտոնում ամառվա ընթացքում:
Թորիների առաջնորդների մրցույթի ժամանակացույցը պետք է հաստատվի հաջորդ շաբաթ, եւ ակնկալվում է, որ նոր վարչապետը սեպտեմբերին կնշանակվի:
Ջոնսոնի պաշտոնի համար պայքարը կարծես թե սկսվել էր դեռեւս նրա հրաժարականի հաստատումից առաջ, իսկ գլխավոր դատախազ Սուելլա Բրեյվերմանը չորեքշաբթի երեկոյան զարմացրել էր շատերին՝ հայտարարելով առաջադրվելու իր մտադրության մասին:
Ակնկալվում է, որ մինչեւ 10 թեկնածու կարող է ինքնառաջադրվել, թեեւ ներկայումս Ջոնսոնին փոխարինելու ակնհայտ առաջնորդ չկա:
Արտաքին հարաբերությունների հատուկ հանձնաժողովի նախագահ եւ Ջոնսոնի ականավոր քննադատ Թոմ Թուգենդհաթը ուրբաթ օրը The Daily Telegraph-ում հայտարարել է առաջնորդության իր հայտի մասին:
Մյուս հավանական թեկնածուներն են առողջապահության նախկին նախարար Սաջիդ Ջավիդը, ֆինանսների նախարար Նադիմ Զահավին, ֆինանսների նախկին նախարար Ռիշի Սունակը, արտգործնախարար Լիզ Թրասը, նախկին արտգործնախարար Ջերեմի Հանթը, մակարդակի բարձրացման նախկին նախարար Մայքլ Գոուվը, միջազգային առեւտրի նախարար Փեննի Մորդաունթը, պաշտպանության նախարար Բեն Ուոլեսը եւ նույնիսկ Brexit-ի կողմնակից Սթիվ Բեյքերը։
Քաղաքագետները կարծում են, որ նրանցից շատերը գաղտնի պլանավորել են իրենց քարոզարշավները մի քանի շաբաթվա ընթացքում։
YouGov-ի հարցումը, որի ընթացքում Պահպանողական կուսակցության 716 անդամների հարցրել են, թե ում կցանկանային տեսնել Ջոնսոնի փոխարեն, ցույց է տվել, որ Ուոլեսը եւ Մորդաունթը հավասար հնարավորություններ ունեն, եւ յուրաքանչյուրին սատարում է հարցվածների 13 տոկոսը: Նրանց հաջորդում են Սունակը՝ 10 տոկոսով եւ Թրասը՝ 8 տոկոսով:
Հատկանշական է, սակայն, որ թեկնածուներին համեմատող YouGov-ի առանձին հարցումը ցույց է տվել, որ Ուոլեսը Պահպանողական կուսակցության անդամների բացահայտ ֆավորիտն է կուսակցության հաջորդ առաջնորդի պաշտոնի համար:
Կուսակցության առաջնորդին ընտրում են նախ պահպանողական պատգամավորները, այնուհետեւ քվեարկում են Պահպանողական կուսակցության անդամները։
Կուսակցության հաջորդ առաջնորդը դառնալու համար թեկնածուները պետք է ունենան առաջարկող, մրցավկա եւ որոշակի թվով կողմնակիցներ։ Այս պայմանները նախատեսված են չափազանց երկար ցուցակի կանխման համար:
Հենց որ թեկնածուները հայտնի դառնան՝ խորհրդարանի 360 պահպանողական պատգամավորները մի շարք քվեարկություններով նրանց թիվը կհասցնեն երկուսի:
