Մենք արդեն COVID-19-ի նոր ալիքի մեջ ենք

COVID-19-ի «Օմիկրոն» տարբերակի BA.4 and BA.5 ենթատեսակներով պայմանավորված նոր դեպքերի աճ է արձանագրվել աշխարհի 110 երկրում` ԱՀԿ վեց տարածաշրջաններից երեքում: Վերջին օրերի ամենօրյա վիճակագրության մեջ հաստատված դեպքերի քանակն ավելանում է նաև Հայաստանում:

 

Արդյո՞ք պետք է անհանգստանալ աճող թվերից, և որքա՞ն հավանական է վարակի նոր ալիքի բռնկումը, 1or.am-ը փորձել է պարզել վարակաբան Արմեն Օհանյանի հետ զրույցում.

 

«Վտանգավորությունը հիմա գնահատել անհնար է, ամենայն հավանականությամբ պետք է դիտարկել, որ համեմատած ավելի մեղմ է ընթանալու, այսինքն այն կտրվածքով, որ տոկոսային հարաբերակցությամբ մահացությունների թիվն ավելի քիչ է լինելու։ Բայց տարածվածությունը բավականին մեծ է, և հիմա երևի թե մենք արդեն նոր ալիքի մեջ ենք։ Ուղղակի այդ թվերի աճը չենք տեսնում, քանի որ մարդիկ չեն գնում թեստավորման։ Այսինքն, քանի որ ընդհանուր հիվանդությունը թեթև է ընթանում, և խուճապի չեն մատնվում մարդիկ, չեն գնում թեստավորման։

 

Հիմնականում թեստավորվում են, երբ բարդ դեպք է լինում կամ փաստաթղթային հարցերում պետք է լինում։ Մնացած դեպքերում, երբ պացիենտը ջերմում է կամ ունենում է որոշակի գանգատներ, հիմնականում չի դիմում թեստավորման, և մենք բաց ենք թողնում շատ դեպքեր։ Այն թվերը որոնք ունենք հիմա, իրականում բավականին մեղմ են արտահայտում իրավիճակը, դեպքերը շատ ավելի շատ են։ Բնականաբար, զբոսաշրջային սեզոնը որոշակիորեն ակտիվացնելու է, շատացնելու է դեպքերի քանակը, բայց ոչ էական կամ սկզբունքային ինչ-որ բան է փոխվելու։ Դրանից դեպքերը կավելանան, միգուցե տուրիստներին ավելի շատ թեստավորեն և ավելի շատ հայտնաբերվի, սակայն այնպես չէ, որ եթե տուրիստները չլինեին, հիվանդությունն ավելի քիչ կտարածվեր»։