Կոսմետոլոգի մոտ. ամեն ինչ՝ արևապաշտպան քսուքների մասին
ՀԱՍԱՐԱԿՈՒԹՅՈՒՆ
Մաշկն արևից անհրաժեշտ է պաշտպանել տարվա բոլոր եղանակներին: Ուսումնասիրությունները ցույց են տալիս, որ մարդկանց մեծամասնությունը ճիշտ եղանակով չի օգտագործում արևապաշտպան քսուքները՝ իրենց մաշկի առավելագույն պաշտպանությունն ապահովելու համար:
1or.am-ը կոսմետոլոգ Հեղինե Զուրաբյանի հետ զրույցում պարզել է ամեն ինչ արևապաշտպան քսուքների մասին.
«Արևապաշտպանն առաջին հերթին պաշտպանում և կանխարգելում է մաշկային քաղցկեղի առաջացումն ու զարգացումը, որը մեր օրերում շատ մեծ տարածում ունի։ Կանխարգելում է սև բծերի առաջացումը և ապահովում մաշկի միատոն տեսքը առավել ևս, եթե օգտագործում եք հակաբիոտիկներ կամ հորմոնալ հաբեր, ապա արևապաշտպան կրեմի օգտագործումը դառնում է խիստ անհրաժեշտ` խուսափելու համար մաշկի վրա քարտեզանման մուգ հատվածների առաջացումից:
Ամեն օր պետք է օգտագործել առնվազն SPF 15՝ որպես ձեր առօրյայի մի մաս: Եթե պատրաստվում եք երկար ժամանակ արևի տակ մնալ, օգտագործեք SPF 30 կամ ավելի բարձր դասակարգման արևապաշտպան: Երբ գտնվում եք դրսում կամ անգամ լողավազանից դուրս գալուց հետո, պետք է ամեն ժամ թարմացնեք արևապաշտպան քսուքները, նույնիսկ եթե օգտագործում եք բարձր դասակարգման արևապաշտպաններ: Պետք է ուշադրություն դարձնել նաև ժամկետին, քանի որ արևապաշտպան կրեմներում առկա են այնպիսի բաղադրիչներ, որոնք նշված ժամկետից հետո կրեմը դարձնում են ոչ պիտանի:
