Արդո՞ք Թուրքիայի ու Հունաստանի հակամարտությունը «թեժ փուլի» կանցնի
ՄԻՋԱԶԳԱՅԻՆ
Rg.ru-ն գրում է, որ Թուրքիան խզել է Հունաստանի հետ բարձր մակարդակի երկկողմ բանակցությունների ձևաչափը: Այսպիսով, Անկարան էլ ավելի է բարձրացրել խաղադրույքները Աթենքի հետ դեռևս «սառը» հակամարտության մեջ, որը կապված է Արևելյան Էգեյան ծովի Դոդեկանես արշիպելագի մի շարք հունական կղզիների հետ, որոնք Թուրքիան կոչ է անում անհապաղ «ապառազմականացնել»: ՆԱՏՕ-ի անդամ երկու երկրների միջև հունա-թուրքական սրացման ֆոնին երկարամյա տարածքային վեճը ցանկացած պահի կարող է վերածվել «թեժ» դիմակայության։
Թուրքիայի նախագահ Ռեջեփ Թայիփ Էրդողանը հայտարարել է Հունաստանի հետ բարձր մակարդակի երկկողմ ռազմավարական խորհրդի կազմից Անկարայի դուրս գալու մասին մեղադրելով Աթենքին «պատմության դասեր չքաղելու» մեջ։ Հենց հաջորդ օրը Թուրքիայի առաջատար ընդդիմադիր Ժողովրդահանրապետական կուսակցության առաջնորդ Քեմալ Քըլըչդարօղլուն փաստացի պաշտպանել է Էրդողանի հունական դիրքորոշումը։ «Եթե դուք համարձակություն ունեք, ապա քայլ կատարեք դեպի օկուպացված և զինված կղզիներ: Մենք կաջակցենք ձեզ: Պետք է ճնշում գործադրել Միջերկրական և Էգեյան ծովում», - ասել է նա:
Այսպիսով, թուրքական հիմնական քաղաքական ուժերի միջև կա կոնսենսուս Արևելյան Միջերկրական ծովի տարածաշրջանում Թուրքիայի ազգային շահերը (առկա ծովային սահմանների վերափոխում, երկրի բացառիկ տնտեսական գոտու և մայրցամաքային շելֆի ընդլայնում) պաշտպանելու համար վճռական գործողություններ ձեռնարկելու անհրաժեշտության շուրջ։ Փորձագետների կարծիքով Անկարան դրա համար ունի և՛ ռազմական հնարավորություններ, և՛ Մերձավոր Արևելքում, Հյուսիսային Աֆրիկայում և Հարավային Կովկասում բարձր ինտենսիվությամբ ռազմական հակամարտություններին մասնակցելու մարտական փորձ։
Մյուս կողմից, ժամանակն ակնհայտորեն աշխատում է Հունաստանի օգտին, որը, ակնհայտորեն նայելով իր անհանգիստ հարևանին, իրականացնում է ռազմաօդային ուժերի և նավատորմի արդիականացման լայնածավալ ծրագրեր Ֆրանսիայից գնելով ժամանակակից Rafale կործանիչներ և BELHARRA կառավարվող հրթիռային ֆրեգատներ։ Բացի այդ, Հունաստանի վարչապետ Կիրիակոս Միցոտակիսի կառավարությունը, ըստ լրատվամիջոցների, համաձայնության է եկել Վաշինգտոնի հետ ամերիկյան հինգերորդ սերնդի F-35 կործանիչների մատակարարման շուրջ՝ որպես Էլլադայի կողմից ԱՄՆ-ի հինգ նոր ռազմաբազաների ստեղծման համար տրամադրված տարածքների «փոխանակման» մաս։
Հունաստանում ԱՄՆ-ի ռազմական ներկայության ընդլայնումն ավելի ու ավելի շատ հարցեր է առաջացնում Անկարայի համար:
Ի դեպ, հենց Հունաստանում ԱՄՆ-ի ռազմական ներկայության աննախադեպ ընդլայնումն է, որ Անկարայում հարց է առաջացնում. ընդդեմ ու՞մ են ուզում ընկերություն անել ամերիկացիները և հույները: Թուրքիայի համար, որը ձգտում է Սպիտակ տան քմահաճույքներից անկախ արտաքին քաղաքականություն վարել, պատասխանն ակնհայտ է:
Աթենքը համոզում է եվրոպացի և ամերիկացի դաշնակիցներին նոր զենք չվաճառել թուրքերին և չթարմացնել եղածները։ Եվ ամենակարևորը. Անկարային չվերադարձնել ամերիկյան F-35 կործանիչների արտադրության ծրագրին, որից ԱՄՆ-ը նախկինում դուրս էր շպրտել Թուրքիային ռուսական S-400 հակաօդային պաշտպանության նորագույն համակարգերի գնման պատճառով։ Ժամանակի ընթացքում իր արևմտյան հարևանի նկատմամբ ՆԱՏՕ-ում ԱՄՆ-ից հետո երկրորդ ամենամեծ բանակն ունեցող Թուրքիայի ռազմատեխնիկական առկա առավելությունը կարող է ի չիք դառնալ։ Հատկապես հաշվի առնելով այն, որ թուրքական ռազմական ավիացիոն նավատորմը արագորեն հնանում է։ Այդ ֆոնին վերջին շաբաթներին անընդհատ աճում է Հունաստանի օդային տարածքի խախտման դեպքերը թուրքական ինքնաթիռների կողմից։ Աթենքը, ըստ հունական լրատվամիջոցների, իր զինված ուժերը բերել է լրիվ պատրաստության վիճակի։
Նյութը հրապարակման պատրաստեց Կամո Խաչիկյանը
