Վահան Քերոբյանը «խոստովանել» է, որ մսխել է բյուջեից հատկացված միլիոնավոր դրամները

Հունվարի 29-31-ը Արաբական Միացյալ Էմիրություններ «ԷՔՍՊՈ 2020–Դուբայ» համաշխարհային ցուցահանդեսին մասնակցած ՀՀ էկոնոմիկայի նախարար Վահան Քերոբյանը հաշվետվություն է ներկայացրել այցի վերաբերյալ: Հաշվետվության մեջ կարդում ենք. «Վ․ Քերոբյանը ս.թ. հունվարի 31-ին Դուբայում գտնվելու ընթացքում հանդիպել է Շեյխ Սաիդ Բին Ահմեդ Ալ Մաքթում անձնական գրասենյակի տնօրեն պարոն Հիշամ Ալ Գուրգի հետ։ Հանդիպման ընթացքում զրուցակիցները մտքեր են փոխանակել երկու երկրների միջև հետագա համագործակցության ամրապնդման և ընդլայնման վերաբերյալ։ Արդյունքում ձեռք է բերվել պայմանավորվածություն՝ հետագայում ավելի առարկայական քննարկելու անելիքները։ Պաշտոնական բացման արարողության ընթացքում, ինչպես նաև դրանից հետո կազմակերպվել են մի շարք մշակութային միջոցառումներ»։  

Հիշեցնենք, որ սույն էքսպոյում հայկական տաղավարը ներկայացնելու համար բյուջեից հատկացվել է 834,726.0, որից 180 միլիոնը գնում է մեկ անձից առանց մրցույթի: Այսինքն՝ Վահան Քերոբյանը ներկայացնում է մի հաշվետվություն, համաձայն որի` նա պետության կողմից հատկացված գումարները ծախսել է մշակութային միջոցառումներին մասնակցելու նպատակով, կարծես թե մոռանալով՝ որ ոլորտն է ինքը ղեկավարում: Որպես կարևոր ձեռքբերում` այս պատմական հաշվետվության մեջ նշվում է նաև այցելությունները այլ երկրների տաղավարներ: Հարց է առաջանում` իսկ ուրիշ ինչո՞վ պետք է զբաղվեր Վահան Քերոբյանը, եթե ոչ այլ երկրների տաղավարներ այցելելով, չէ որ դա ի վերջո ընդունված պրակտիկա է: Այլ հարց է, որ բավական կասկածելի ձեռքբերում է ՀՀ տնտեսության համար:

Իր այս հաշվետվությամբ, փաստորեն, Քերոբյանը ընդունում է, որ աննապատակ վատնել է բյուջեից հատկացված գումարները և մսխել դրանք՝ ՀՀ տնտեսությանը և ՀՀ-ին չբերելով ոչ մի գործնական օգուտ: