Ես վաղն առերեսման ժամանակ կստիպեմ, որ իրենք ճիշտն ասեն. Դավիթ Առուշանյանի մայր

Արցախի հերոս Դավիթ Առուշանյանի մոր՝ տիկին Լիդային դանակով սպառնացած 16 և 17 տարեկան դպրոցական աղջիկները Ոստիկանության Նոր Նորքի բաժնի ծառայողների ձեռնարկած միջոցառումների արդյունքում, սպանության սպառնալիքի կասկածանքով, Մառի փողոցից բերման են ենթարկվել և տվել են խոստովանական բացատրություն:

Տիկին Լիդայի խոսքով՝ դեռ առերեսում չի եղել, աղջիկներին վաղն է հանդիպելու.

«Ճիշտն ասած՝ երևի թյուրիմացություն է եղել, նմանեցրել եմ, ասում են՝ ուրիշ աղջիկներ են, ոչ մեր դպրոցից: Բայց դե, ամոթ իրենց, ի՞նչ ասեմ: Ես հետո իմացա, որ դեպքի ժամանակ պատի հետևում երկու կին են եղել, կադրերում երևում է: Հետո մոտեցան, հարցրեցին՝ ինչ էին ուզում, ասացի՝ այ տնաշեններ, բա մոտենայիք, չեք տեսնո՞ւմ անտարբերությունից ինչեր է լինում»,- 1or.am-ի հետ զրույցում ասաց տիկին Լիդան:

Հատկանշական է, որ ՀՀ Ոստիկանության տարածած հաղորդագրության մեջ դեպքը այլ կերպ է ներկայացված, նշվում է, որ տիկին Լիդան Նոր Նորքի 5-րդ զանգվածի թիվ 166 դպրոցի բակում նկատել է, որ երկու աղջիկ դանակով սպառնում են մի երեխայի: Ինքը մոտեցել է, որ կանխի միջադեպը, սակայն նրանք դանակով սպառնացել են, որ կսպանեն իրեն: Մինչդեռ տիկին Լիդայի խոսքերով՝ աղջիկները հայհոյանքներ են հնչեցրել այդ թաղամասում բնակվող արցախցի ընտանիքների հասցեին, ինքը նկատողություն է արել, և աղջիկները դրա համար են իրեն դանակով սպառնացել.

«Այդպիսի բան չի եղել, եթե նույնիսկ ամեն ինչ իրենց ներկայացրածով է, ավելի վատ իրենց համար: Ես վաղն առերեսման ժամանակ կստիպեմ, որ իրենք ճիշտն ասեն: Ես իրենց ոչ մի նկատողություն չեմ անելու, ոստիկանությունն ինչ ուզում է, թող անի: Ես միայն խնդրելու եմ, որ ոստիկանությունն այնպես անի, որ նրանք ծնկաչոք ներողություն խնդրեն արցախցիներին վիրավորելու համար և դանակը հանձնեն ոստիկանությանը»: 

Մարիամ Նալբանդյան