Քաղաքագետը՝ Մոսկվայում այսօր ստորագրվելիք փաստաթղթերի մասին
ՔԱՂԱՔԱԿԱՆՈՒԹՅՈՒՆ
Ռուսաստանի նախագահի մամուլի քարտուղար Դմիտրի Պեսկովը լրագրողներին հայտնել է, որ Հայաստանի վարչապետ Նիկոլ Փաշինյանի Մոսկվա կատարած այցի ընթացքում նախատեսվում է ստորագրել երկկողմ փաստաթղթերի փաթեթ:
1or.am-ը քաղաքագետ Ռուբեն Մեհրաբյանի հետ զրույցում փորձել է պարզել, թե ի՞նչ փաստաթղթերի մասին կարող է լինել խոսքը.
«Այս պահին միայն այդ հայտարարության մասին ենք տեղյակ, պետք է ուղղակի սպասել, բայց միանշանակ խոսքը հայ-ռուսական փաստաթղթերի մասին է:
Ես կարծում եմ, որ հայկական կողմի վրա ճնշումներ գործադրելու փորձեր կարվեն: Անուղղակիորեն կարող են հավելյալ պարտավորություններ դրվել հայկական կողմի վրա, որոնք կսահմանափակեն մեր հնարավորությունները արտաքին աշխարհի հետ հարաբերություններում, դրա ռիսկն ամեն դեպքում կա: Որովհետև մենք հասկանում ենք, որ Ռուսաստանի շահը հենց կայանում է նրանում, որ Հայաստանին կաշկանդված վիճակում պահի, որ ռուսական պլաններն ավելի դյուրին իրականացվեն»:
Անդրադառնալով երեկ կայացած Փաշինյան-Հարությունյան հանդիպմանը՝ քաղաքագետը նշեց.
«Բոլոր դեպքերում հանդիպման անհրաժեշտությունը եղել է Պուտինի հետ հանդիպումից առաջ, որ, այսպես ասած, երկուսի խոսքն էլ մեկ լինի տարբեր հարցերում: Կարծում եմ՝ դա օգտակար հանդիպում էր, իսկ մանրամասներին, բնականաբար, չենք կարող տեղյակ լինել: Կարելի է ենթադրել, որ խոսք է գնացել միջազգային հարաբերությունների ներկայիս համատեքստում մեր շահերը լավագույնս սպասարկելուն ուղղված ջանքերի համադրման մասին»:
Մարիամ Նալբանդյան
