Նոր ախտահանիչ ծածկույթը կարող է պաշտպանել կորոնավիրուսից
ՀԱՍԱՐԱԿՈՒԹՅՈՒՆ
Ճապոնացի գիտնականները մշակել են նոր ախտահանիչ ծածկույթ, որը կարող է օգտագործվել վիրուսներից, այդ թվում՝ SARS-CoV-2 կորոնավիրուսից պաշտպանվելու համար։ Նոր հետազոտությունը հրապարակվել է Scientific Reports ամսագրում։
Նման ծածկույթի անհրաժեշտությունն առաջացել է կորոնավիրուսի տարածման առանձնահատկություններից ելնելով, որը, ինչպես հայտնի է, կարող է փոխանցվել օդակաթիլային ճանապարհով եւ նստել մակերեսների վրա։ Ախտահանման համար սովորաբար օգտագործվող քիմիական նյութերը, ինչպիսիք են սպիրտը կամ ջրածնի պերօքսիդը, բավական արագ գոլորշիանում են։
Կանագավայի արդյունաբերական գիտության եւ տեխնոլոգիաների ինստիտուտի եւ Տոկիոյի տեխնոլոգիական ինստիտուտի գիտնականների մշակումն իրենից ներկայացնում է ֆոտոկատալիզատոր, որը պատրաստված է տիտանի երկօքսիդի (TiO2) եւ պղնձի օքսիդի (CuO) նանոկլաստերի համակցությամբ: Այն ի վիճակի է ոչնչացնել SARS-CoV-2 կորոնավիրուսի տարբեր տարբերակներ։ Բացի այդ, ի տարբերություն ավելի վաղ տարբերակների՝ մշակումն արդյունավետ է ինչպես մթության մեջ, այնպես էլ ներսի լուսավորության պայմաններում:
