ԱՄՆ–ի Պետդեպարտամենտը Ադրբեջանին մեղադրում է մարդու իրավունքների բազմաթիվ խախտումների մեջ
ՄԻՋԱԶԳԱՅԻՆ
Infoteka24.ru–ն գրում է, որ ԱՄՆ–ի Պետդեպարտամենտը հրապարակել է մարդու իրավունքների վերաբերյալ հերթական զեկույցն ըստ երկրների։ Ադրբեջանի համար զեկույցում նշվում է, որ ԵԱՀԿ դիտորդական առաքելությունը եզրակացրել է, որ 2020 թվականի խորհրդարանական և 2018 թվականի նախագահական ընտրությունները տեղի են ունեցել սահմանափակող օրենսդրական դաշտում և քաղաքական միջավայրում, որը կանխել է իրական ընտրական մրցակցությունը։
Զեկույցում անդրադարձ է եղել նաև հայ-ադրբեջանական սահմանին և այլ տարածքներում տեղի ունեցած պարբերական միջադեպերին, որոնք հանգեցրել են զոհերի և գերեվարման։
Պետքարտուղարությունը նշում է, որ եղել են տեղեկություններ, որ կառավարությունը կամ նրա գործակալները կամայական կամ անօրինական սպանություններ են կատարել: 2020 թվականի աշնանը ադրբեջանական և հայկական ուժերի միջև ինտենսիվ մարտերի ընթացքում ապօրինի սպանությունների մասին ողջ տարվա ընթացքում հայտնի են դարձել հավաստի տեղեկություններ։ Ադրբեջանի և Հայաստանի կողմից Մարդու իրավունքների եվրոպական դատարան ներկայացված բողոքները, որոնցում միմյանց մեղադրել են 2020 և 2016 թվականների ռազմական գործողությունների ժամանակ վայրագություններ կատարելու մեջ, դեռևս դատարանի որոշում չեն ստացել։ Կառավարությունը ճանաչել է 41 հայ ձերբակալվածների փաստը, սակայն կան պնդումներ, որոնք վիճարկում է Ադրբեջանի կառավարությունը, որ առնվազն 25 հայ զինծառայողներ անհետացել են Ադրբեջանի կողմից գերեվարվելուց հետո:
Ադրբեջանում մարդու իրավունքների այլ խախտումներն են.
- սպանություններ, խոշտանգումներ և դաժան, անմարդկային կամ նվաստացուցիչ գործողություններ
- ապօրինի կալանք
- քաղբանտարկյալներ
- քաղաքական դրդապատճառներով բռնաճնշումներ երկրից դուրս գտնվող մարդկանց նկատմամբ
- դատական իշխանության անկախության հետ կապված համատարած խնդիրներ
- կամայական միջամտություն գաղտնիության
- կոնֆլիկտի ընթացքում լուրջ խախտումներ, ներառյալ բռնի անհետացումները, խոշտանգումները և այլ ֆիզիկական բռնությունները
- ազատ արտահայտվելու և լրատվամիջոցների նկատմամբ լուրջ սահմանափակումներ, ներառյալ լրագրողների նկատմամբ բռնությունը, զրպարտության քրեականացումը և կասկածելի եկամուտների համար լրագրողների հետապնդումը և ազատազրկումը
- ինտերնետի ազատության լուրջ սահմանափակումներ, ներառյալ կայքերի արգելափակումները
- խաղաղ հավաքների իրավունքների փաստացի արգելք
- ազատ տեղաշարժի սահմանափակումներ
- քաղաքական մասնակցության խիստ սահմանափակումներ, համակարգային կոռուպցիա
- սեռական կողմնորոշման վրա հիմնված մարդկանց նկատմամբ ոստիկանության դաժանություն, արհմիությունների ազատության էական սահմանափակումներ
- մանկական աշխատանքի ամենավատ ձևերի առկայություն
Կառավարությունը չի հետապնդում և չի պատժում մարդու իրավունքների խախտումնեը և կոռուպցիոն գործողություններ կատարած պաշտոնյաների մեծ մասին:
Նյութը հրապարակման պատրաստեց Կամո Խաչիկյանը
www.1or.am
