Մոսկվան և Պեկինը միասին կշարժվեն դեպի բազմաբևեռ և արդար աշխարհակարգ. մեկնարկել է Լավրովի և Չինաստանի ԱԳ նախարարի հանդիպումը

Չինաստանում մեկնարկել են Ռուսաստանի արտգործնախարար Սերգեյ Լավրովի և Չինաստանի արտգործնախարար Վան Իի բանակցությունները։ Այս մասին չորեքշաբթի Telegram-ում հայտնել է ՌԴ ԱԳՆ պաշտոնական ներկայացուցիչ Մարիա Զախարովան։

«Սերգեյ Լավրովի և Վան Իի միջև բանակցությունները Չինաստանում սկսվել են»,- գրել է նա։ 

Ին իր խոսքում ընդգծել է, որ տարեսկզբից Չինաստանի և Ռուսաստանի հարաբերությունները դիմակայել են համաշխարհային իրավիճակի փոփոխությունների նոր փորձությունների և դրսևորել զարգացման ամուր միտում։

«Այս տարվա սկզբից չին-ռուսական հարաբերությունները դիմակայեցին միջազգային իրավիճակի փոփոխությունների նոր փորձություններին, պահպանեցին ճիշտ ուղղությունը և դրսևորեցին զարգացման ամուր միտում»,- ասել է  նա։

ԱԳ նախարարն ընդգծել է, որ Ռուսաստանի և Չինաստանի վստահությունը տարբեր ոլորտներում համագործակցությունը զարգացնելու հարցում էլ ավելի է ուժեղացել։

«Մենք շահագրգռված ենք, որ ՉԺՀ-ի հետ մեր հարաբերությունները շարունակեն զարգանալ կայուն և հետևողական, մեր ղեկավարները՝ նախագահ Պուտինը և  նախագահ Սի Ծինփինը, համաձայնության են եկել այս հարցում: Եվ այսօր, ինչպես Դուք ասացիք, մենք դիտարկելու ենք կոնկրետ քայլեր, որոնք միտված են ապահովելու, որ այդ բոլոր պայմանավորվածությունները հետևողականորեն իրականացվեն»,- իր հերթին ասել է Լավրովը։

Ռուսաստանը, Չինաստանը և համախոհները միասին կշարժվեն դեպի բազմաբևեռ և արդար աշխարհակարգ՝ հետևելով «միջազգային հարաբերությունների պատմության լուրջ փուլի» արդյունքներին, ասել է Լավրովը։

Նշենք, որ Լավրովը ժամանել է Չինաստանի Տունսի քաղաք, որտեղ մարտի 31-ին կմասնակցի Աֆղանստանին հարևան երկրների երրորդ նախարարական համաժողովին։ Մարտի 30-ին ՌԴ դիվանագիտական գերատեսչության ղեկավարը մի շարք բանակցություններ կանցկացնի օտարերկրյա գործընկերների հետ։