Հայաստանի իշխանությունները պատրաստ են զիջումների գնալ Թուրքիային և Ադրբեջանին. փորձագետ
ՔԱՂԱՔԱԿԱՆՈՒԹՅՈՒՆ
regnum.ru-ն գրում է, որ Նիկոլ Փաշինյանը Արևմուտքի ղեկավարությամբ Ադրբեջանին զիջումների է գնում Լեռնային Ղարաբաղի կարգավիճակի հարցում, իսկ Թուրքիային 1915 թվականի Հայոց ցեղասպանության հարցում։ Այս մասին REGNUM-ի թղթակցին ասել է քաղաքագետ, «Ժողովրդի ձայնը» (Հայաստան) փորձագիտական ակումբի անդամ Արման Ղուկասյանը։
«Այդ հինգ կետերի հիմնական և կարևոր ուղերձն այն է, որ հայկական կողմը հրաժարվում է Ադրբեջանի նկատմամբ տարածքային պահանջներից։ Մենք գիտենք, որ այսօր կա Արցախի կարգավիճակի խնդիր, որը պետք է լուծվի ապագայում։ Ադրբեջանն անընդհատ ասում է, որ Արցախի շուրջ այլևս խնդիրներ չկան: Այժմ Բաքուն և Անկարան ԱՄՆ-ի և Բրիտանիայի հովանավորությամբ փորձում են արագացնել Հայաստանի և Ադրբեջանի միջև խաղաղության համաձայնագրի ստորագրման գործընթացը, քանի դեռ Ռուսաստանը զբաղված է Ուկրաինայում։ Հայաստանի իշխանությունները անգամ սիրախաղ են անում Արևմուտքի հետ, և մենք տեսնում ենք, որ ի պատասխան ադրբեջանական սադրանքների Հայաստանը պատրաստ է զիջումների գնալ, այդ թվում՝ Արցախի և Անկարայի հետ հարաբերությունների կարգավորման հարցում՝ շրջանցելով Թուրքիայի կողմից Հայոց ցեղասպանության ճանաչման հարցը։ Փաշինյանի քաղաքականությունը մեծ սպառնալիքներ է պարունակում հայկական պետականության համար»,- ասել է փորձագետը։
Հիշեցնենք, որ Բաքուն հինգ կետից բաղկացած առաջարկներ է ներկայացրել Երևանին երկրների միջև հարաբերությունների կարգավորման վերաբերյալ։ Իր հերթին Հայաստանը հայտարարել է Թուրքիայի հետ դիվանագիտական հարաբերություններ հաստատելու և հայ-թուրքական սահմանը բացելու պատրաստակամության մասին։
Նյութը հրապարակման պատրաստեց Կամո Խաչիկյանը
