Դիրիժոր Վասիլի Պետրենկոն և դաշնակահար Սիմոն Տրպչեսկին Երևանում հանդես կգան Ազգային ֆիլհարմոնիկ նվագախմբի հետ

Հայաստանի ազգային ֆիլհարմոնիկ նվագախումբը փետրվարի 25-ին «Արամ Խաչատրյան» համերգասրահում կներկայանա բացառիկ համերգով, որը կղեկավարի հանրաճանաչ դիրիժոր Վասիլի Պետրենկոն: Որպես մենակատար ելույթ կունենա դաշնակահար Սիմոն Տրպչեսկին: Նվագախմբի գեղարվեստական ղեկավար և գլխավոր դիրիժոր Էդուարդ Թոփչյանի հավաստիացմամբ՝ այս կարգի մեծության դիրիժոր վերջին հիսուն տարվա ընթացքում հայկական որևէ նվագախմբի հետ հանդես չի եկել:

Երեկոյին կհնչեն Վեբերի «Ազատ հրաձիգը» օպերայի նախերգանքը, Ռավելի Դաշնամուրի կոնցերտ G-dur-ը և Բրամսի Սիմֆոնիա թիվ 1-ը:

Փետրվարի 23-ին լրագրողների հետ հանդիպմանը Վասիլի Պետրենկոն, որը Լոնդոնի թագավորական ֆիլհարմոնիկ նվագախմբի երաժշտական ղեկավարն է, Եվրամիության երիտասարդական նվագախմբի գլխավոր դիրիժորը, Լիվերպուլի թագավորական ֆիլհարմոնիկ նվագախմբի դափնեկիր դիրիժորը և Սվետլանովի անվան Ռուսաստանի պետական ակադեմիական նվագախմբի գեղարվեստական ղեկավարը, նշեց՝ եկրորդ անգամ է Երևանում: Առաջին անգամ մեր մայրաքաղաք է այցելել 35 տարի առաջ: «Շատ բան է փոխվել, բայց մարդիկ դեռ հյուրընկալ են, սիրալիր, և ես դա զգացի այստեղ լինելու առաջին իսկ օրերին: Ուրախ եմ, որ ղեկավարելու եմ այս նվագախումբը, որը մեծ պոտենցիալ ունի: Միշտ հետաքրքիր է նոր կոլեկտիվներ, նոր դեմքեր ու անուններ բացահայտելը: Հուսամ՝ համերգը երաժշտասերներին դուր կգա»,-ասաց նա ու հավելեց, որ համերգի, դիրիժորի և նվագախմբի հաջող համագործակցությունը կախված է նաև նրանից, թե որքանով է նվագախումբը կիսում երաժշտական այն գաղափարները, որոնք առաջարկում է դիրիժորը:

Վասիլի Պետրենկոյի խոսքով՝ Ֆիլհարմոնիկ նվագախմբին մոտ է այն մեկնաբանությունը, որն ինքն է առաջարկում, ուստի աշխատանքը հեշտ է և հաճելի:

Դիրիժորը, որը երկար տարիներ աշխատում է տարբեր նվագախմբերի հետ, խոստովանեց՝ աշխատանքի ընթացքում ոչ թե դիրիժորական, այլ մարդկային փորձ է ձեռք բերել. կարողանում է հասկանալ, թե ինչ է մտածում դիմացինը, ինչպես է վերաբերվում քեզ ու երաժշտությանը: «Ձեռք եմ բերել համբերություն: Յուրաքանչյուր կոլեկտիվ անհատականությունների ամբողջություն է, և որքան պրոֆեսիոնալ է այն, այնքան վառ անհատականություններ են այնտեղ հավաքված: Երաժիշտներից յուրաքանչյուրն ունի սեփական կարծիքը այս կամ այն ստեղծագործությունը հնչեցնելու ձևի մասին: Երբ երիտասարդ ես ու կարծում ես, որ քեզնից ու Ֆոն Կարայանից բացի այս կյանքում ոչ ոք չի եղել, այդ ժամանակ գործընթացի բոլոր մասնակիցների հանդեպ հարգանք ու համբերություն դրսևորելը բավականին դժվար է, քանի որ դիրիժորը ևս անհատականություն է: Մենք բոլորս ներսում լսում ենք երաժշտությունը, յուրաքանչյուր երաժշտություն հնչում է մեր ներսում մեզ համար կատարյալ կատարմամբ, սակայն մենք չենք նվագում, այլ՝ նվագախումբը: Դիրիժորի խնդիրն է նվագախմբի հնչողությունը մոտեցնել այդ կատարյալ կատարմանը: Դա անելու հնարավորություն ունենալու համար համբերություն է պետք»,-շեշտեց դիրիժորը:

Պետրենկոն իր գործունեության ընթացքում հնչեցրել է Արամ Խաչատրյանի, Առնո Բաբաջանյանի գործերը: Համաշխարհային հեղինակներին ներկայացնելուց զատ անդրադառնում է նաև ժամանակակիցներին և կարծում է, որ յուրաքանչյուր նվագախումբ ժամանակակիցներին ներկայանալու հնարավորություն պետք է տա: Դասական կդառնան, թե ոչ՝ կորոշի ժամանակը:

Սիմոն Տրպչեսկին (Հյուսիսային Մակեդոնիա) իր կարիերայի ընթացքում ելույթներ է ունեցել լավագույն համերգասրահներում Լոնդոնի սիմֆոնիկ, Ֆրանսիայի ազգային, Թագավորական Կոնցերտգեբաու, Դրեզդենի ֆիլհարմոնիկ, Քլիվլենդի, Ֆիլադելֆիայի, Լոս Անջելեսի, Նյու-Յորքի, Չիկագոյի, ինչպես նաև Ճապոնիայի, Հոնկ Կոնգի, Սիդնեյի, Մելբուրնի և այլ հեղինակավոր նվագախմբերի հետ:

Հատկապես Լիվերպուլի թագավորական ֆիլհարմոնիկ նվագախմբի հետ Տրպչեսկին կապված է երկարամյա համագործակցությամբ: Այդ կապն ավելի ամրացավ, երբ նվագախմբի գլխավոր դիրիժոր նշանակվեց Վասիլի Պետրենկոն: Բացի համատեղ համերգներից, նրանք միասին ձայնագրել են ռուսական դաշնամուրային երկացանկի հսկաների ստեղծագործություններ:

Նա նշեց, որ մի քանի անգամ է ելույթ ունեցել Հայաստանում և Ֆիլհարմոնիկ նվագախմբի հետ ամուր կապեր են ստեղծվել, քանի որ նվագախմբում մարդիկ են, որոնք նվիրված են դասական երաժշտությանն ու անում են հնարավորը՝ այն զարգացնելու համար: «Երջանկություն է կրկին լինել Հայաստանում, նվագել Ֆիլհարմոնիկի հետ, որն այս անգամ ղեկավարելու է աշխարհում մեծ ճանաչում վայելող Վասիլի Պետրենկոն»,-ասաց նա:

Ե՛վ Պետրոնեկն, և՛ Տրպչեսկին նշեցին, որ համերգին հնչեցնելու են ստեղծագործություններ, որոնք յուրահատուկ են, գեղեցիկ, ազդեցիկ ու զգացմունքային: