Արվեստներից ամենագլխավորը. Ադրբեջանը կպատասխանի հայկական «գեղարվեստական մարտահրավերին»
ՄՇԱԿՈՒՅԹ
eadaily.com-ը գրում է, որ Ադրբեջանում այս տարի կսկսվեն 2020 թվականի աշնանը Ղարաբաղի 44-օրյա պատերազմի մասին պատմող գեղարվեստական ֆիլմի նկարահանումները։ Այս մասին հայտնել են հանրապետության մշակույթի նախարարությունից: Գերատեսչության տվյալներով՝ ներկայումս աշխատանքներ են տարվում ֆիլմի սցենարի վրա։ «Ցանկացած լիամետրաժ գեղարվեստական ֆիլմի նկարահանումը որոշակի ժամանակ է պահանջում: Եթե ֆիլմը հիմնված է իրական իրադարձությունների վրա, ապա այս գործընթացն ավելի լուրջ ու պատասխանատու է դառնում։ Ներկայումս պատերազմին առնչվող տեղեկատվություն է հավաքագրվում և մշակվում սցենարի համար։ Այս տարվա ընթացքում նախատեսվում է սցենար գրել, նախապատրաստել և սկսել ղարաբաղյան պատերազմի մասին ֆիլմի նկարահանումները»,- հայտնել են Ադրբեջանի մշակույթի նախարարությունից։
Իսկ վերջերս հայկական լրատվամիջոցները տեղեկություն են տարածել, որ ի հիշատակ պատերազմում զոհված հերոսների հանրապետությունում նկարահանվել է «Արյան կանչը» գեղարվեստական ֆիլմը։ Ինչպես հաղորդել է «Արմենպրես» պետական գործակալությունը, կինոռեժիսոր Արմեն Դալլաքյանը հայտնել է, որ ֆիլմը հիմնված է իրական իրադարձությունների վրա։ Փետրվարի 10-ին ֆիլմի առաջին ցուցադրությունը կկայանա Հայաստանի մայրաքաղաքի կինոթատրոններում, իսկ մարտի 1-ից այն կցուցադրվի հանրապետության մարզերում։
Նյութը հրապարակման պատրաստեց Կամո Խաչիկյանը
