Աննախադեպ դատավարություն․ ամեն ինչ, որ դռնփակ անեն հրթիռների դատը

Երևանի ընդհանուր իրավասության դատարանը շարունակում է խախտել «անորակ հրթիռների» գործով մեղադրվող, զենքի մատակարար, «Պատրոն Դավո» մականունով Դավիթ Գալստյանի, պաշտպանության նախկին նախարար Դավիթ Տոնոյանի և այլ բարձրաստիճան զինվորականների իրավունքները։ Դռնփակ դատական նիստեր սովորաբար անցկացվում են ամբաստանյալների կամ նրանց պաշտպանների միջնորդությամբ, բայց հրթիռների գործով դատարանն ու դատախազությունն են շահագրգիռ հնարավորինս քիչ հանրությանը տեղեկություններ հայտնելու հարցում։

Գալստյանի և Տոնոյանի պաշտպանների միջնորդությունը՝ դատավոր Մանվել Շահվերդյանին ինքնաբացարկ հայտնելու մասին, մերժվեց։ Սա վկայում է, որ գործող վարչախումբը՝ Նիկոլ Փաշինյանի գլխավորությամբ, շահագրգռված է, որպեսզի դատավարությունից քիչ մանրամասներ հայտնի դառնա հանրությանը։ Ինչևէ, այս գործը սպառնում է դառնալ անկախ Հայաստանի պատմության ամենազարհուրելի և տարօրինակ դատաքննություններից մեկը։ Անհրաժեշտ է միայն, որպեսզի մեղադրյալները ի վերջո բացահայտեն, թե ով է իրականում մեղավոր պետության գանձարանին և անվտանգությանը հասցված վնասի համար։

Դավիթ Տոնոյանի և Դավիթ Գալստյանի փաստաբանները նախկինում հայտարարություններ էին տարածել, որ հիմնավոր փաստարկներով են ապացուցելու իրենց բարի համբավը։ Ի դեպ, երեկ նաև ուշագրավ մի դեպք է գրանցվել։ Իշխող «Քաղաքացիական պայմանագիր» կուսակցության երկու անդամներ՝ Վիլեն Գաբրիելյանն ու Քրիստինե Պողոսյանն էին եկել դատարան, որպեսզի անձնական երաշխավորություն ներկայացնեն պաշտպանության նախկին նախարար Դավիթ Տոնոյանին ազատ արձակելու համար։ Եկել էր նաև «Հանրապետություն» կուսակցության նախագահ, Արամ Սարգսյանը՝ Սպարապետ Վազգեն Սարգսյանի եղբայրը։

«Պարոն Տոնոյանին շատ լավ ճանաչելով... նաև անհեթեթ եմ համարում մարդուն, ում մենք վստահել ենք մեր պետության պաշտպանությունը, Պաշտպանության նախարար է եղել, էսօր պիտի մենք ինքներս վստահություն հայտնենք, որ պարոն Տոնոյանը չի խոչընդոտի նախաքննությունը, չի լքի երկիրը... անհեթեթություն է, իհարկե, չի լքի։ Իհարկե, չի խոչընդոտի, խոչընդոտելու հնարավորություն էլ չկա, գործով գրեթե բոլորը կալանավորված են, ովքեր էլ կալանավորված չեն, բարձր պաշտոնյաներ են։ Էնպես որ, էստեղ խնդիր չեմ տեսնում»,- ասել է Սարգսյանը։

Իշխանական պատգամավորները չեն մեկնաբանել իրենց քայլը, սակայն ողջունելի է, որ նույնիսկ բռնապետության ձգտող փաշինյանական համակարգում կան մարդիկ, որոնք հանդգնում են իրենց ձայնը բարձրացնել իրենց ընկերոջ, պաշտպանության նախկին նախարարի համար։ 

Գևորգ Ալեքսանյան