Նիկոլ Փաշինյանի ամեն գնով փորձում է ցույց տալ իր և իր թիմի կողմից գործընթացի անշեղ իրագործումը
ՔԱՂԱՔԱԿԱՆՈՒԹՅՈՒՆ
Արցախի բանակցային հարցի վերաբերյալ Նիկոլ Փաշինյանի վերջին հայտարարությունները բուռն արձագանք ունեցան, Արցախի Ազգային ժողովն ի պատասխան հայտարարություն ընդունեց։
Այս թեմայի շուրջ զրուցել ենք քաղաքագետ Սարո Սարոյանի հետ։
Հարցին, թե քաղաքագետն ինչպես է վերաբերում այս հայտարարություններն ու ստեղծված իրավիճակին` Սարո Սարոյանն ասաց․ «Նիկոլ Փաշինյանի հարցազրույցում հնչած հիմնական շեշտադրումների հասցեատերը պաշտոնական Անկարան ու Բաքուն էին։ Եվ իզուր չէ, որ դրանից հետո էլ թուրքական համապատասխան շրջանակները նշում են, որ որոշակի գործընթացներ կան, որոնք պաշտոնական Երևանի հետ առաջիկայում պետք է գործարկվեն։ Նիկոլ Փաշինյանը մի խնդիր է լուծում, որ թուրքական կողմերը երբևէ հիմքեր չունենան պնդելու, թե հայկական կողմն ինչ-որ պահանջներ է ներկայացնում։ Ընդհակառակը, հայկական կողմը լիարժեք ընդունում է բոլոր այն պայմանները, որոնք իր առջև դրվել են։ Եվ այդ պայմանների հիման վրա պետք է տեղի ունենա որոշակի գործընթաց, որը հատկապես վերաբերում է կոմունիկացիաների բացմանը, սահմանազատման ու սահմանագծման գործընթացին։ Նիկոլ Փաշինյանի նպատակը դա է, որ ամեն գնով կարողանա ցույց տալ իր և իր թիմի կողմից գործընթացի անշեղ իրագործումը։ Եվ ինքն իր ուզածին հասավ։ Եվ եթե Նիկոլ Փաշինյանը նման քաղաքականություն է վարում, բնականաբար, Արցախի ժողովրդի և համայն հայության համար դա անընդունելի և խնդրահարույց էր լինելու։ Այսինքն՝ դժվար չէր կանխատեսել, թե այդ հայտարարություններն ինչ գնահատականի կարժանանային հայ հանրության, այդ թվում՝ պաշտոնական Ստեփանակերտի կողմից»։
Սոնա Գիշյան
