Կիևն ու Վաշինգտոնը պատրաստվում են ստորագրել համաձայնագիր, որը թույլ կտա ուկրաինական ԱԹՍ-ներ արտահանել ԱՄՆ

Կիևն ու Վաշինգտոնը պատրաստվում են ստորագրել համաձայնագիր, որը թույլ կտա ուկրաինական ԱԹՍ-ներ արտահանել ԱՄՆ՝ ռազմական փորձարկումների համար։ Այս մասին հայտնում է Վեդոմոստի-ն՝ հղում անելով Financial Times-ին։

Նախագիծը նախատեսում է ուկրաինական անօդաչու համակարգերի ժամանակավոր արտահանում՝ ցամաքային, ծովային և օդային գործողությունների համար։ Նախատեսվում է դրանք ԱՄՆ-ում օգտագործել փորձարկումների և գնահատման, ինչպես նաև ամերիկյան բանակի ապագա պահանջների ձևավորման համար։ Միևնույն ժամանակ, պարբերականը նշում է, որ համաձայնագիրը չի նախատեսում իրավաբանորեն պարտադիր մատակարարումներ, ֆինանսավորում կամ տեխնոլոգիաների փոխանցում։

FT-ի տեղեկություններով՝ համաձայնագիրն արտացոլում է ԱՄՆ նախագահ Դոնալդ Թրամփի վարչակազմի աճող հետաքրքրությունը ուկրաինական ռազմական տեխնոլոգիաների նկատմամբ, որոնք ակտիվորեն զարգացել են Ռուսաստանի հետ հակամարտության ընթացքում։

Պենտագոնի ղեկավար Փիթ Հեգսեթը հայտարարել է, որ ամերիկացի զինվորականներն ուսումնասիրում են Ուկրաինայում անօդաչու սարքերի կիրառմամբ մարտական գործողությունների փորձը։

«Բազմաթիվ բարձրաստիճան պաշտոնյաներ են եղել այնտեղ, և մենք հսկայական ծավալի տեղեկատվություն ենք ստացել։ Իրականում ես անձամբ հաստատել եմ այնտեղ լրացուցիչ անձնակազմի ներկայությունը, որպեսզի սովորենք այդ մարտերից՝ անօդաչու սարքերի կիրառմամբ պաշտպանությունից և հարձակումից»,- ասել է Հեգսեթը։

Նրա խոսքով՝ ԱՄՆ-ը քաղում է բոլոր հնարավոր դասերը ուկրաինական հակամարտությունից և ստացված գիտելիքները ներդնում սեփական ռազմական համակարգում։

Մարտին FT-ն գրել էր, որ Կիևը բանակցություններ է վարում Վաշինգտոնի և Մերձավոր Արևելքի մի շարք պետությունների հետ՝ Ռուսաստանի հետ հակամարտության ընթացքում մշակված անօդաչու սարքերի հայտնաբերման և որսման տեխնոլոգիաների փոխանցման շուրջ։