Փոխարժեք՝
475.8
$
529
7.57

Քայքայման եզրին հասած երկիրը չի կարող նման առօրյայով երկար գոյատևել

Հայաստանի վարչապետը կառավարության մի մասնաշենքից մյուսը տեղափոխվելու համար ոտքի է հանում հազարավոր ոստիկանների: Մի քանի հարյուր մետր շառավղով ոստիկանական պատի միջով ապահովվում է Նիկոլ Փաշինյանի հարյուր մետր քայլելու հնարավորությունը: Արձանագրենք, որ սա նախադեպը չունեցող երևույթ է, որ երկրի ղեկավարը մի քանի հարյուր մետր տեղաշարժվելու համար ոտքի է հանում հարյուրավոր ոստիկանների: Հասկանալի չէ, թե այսպես ինչքան կարող է պաշտոնավարել վարչապետը, բայց որ երկար չի կարող՝ դա փաստ է: Ստեղծված իրավիճակն առաջացել է արցախյան պատերազմի ելքով պայմանավորված: Մարդիկ Նիկոլ Փաշինյանին են համարում հիմնական պատասխանատուն և մեղավոր հազարավոր զոհերի ու տարածքային կորուստների համար: Նիկոլ Փաշինյանի համար լավագույն ելքը կլիներ հրաժարական ներկայացնելը, իսկ վատագույն դեպքում արտահերթ ընտրությունների կազմակերպումը: Նա ոչ այն է անում, ոչ մյուսը:

Սկզբում իմիտացիա ստեղծեց, թե քաղաքական կոնսուլտացիաներ է անցկացնում արտահերթ ընտրություններ կազմակերպելու համար, բայց հետո փոշմանեց և հայտարարեց, որ նոր ընտրությունների հանրային պահանջ չկա: Այն, որ նման դեպքերում ընտրությունները քաղաքական լարվածությունը թոթափելու հիմնական միջոցն էր, դա փաստ է, բայց Նիկոլ Փաշինյանը գնում է լարվածության ավելի մեծացման ճանապարհով: Այդուհանդերձ, արձանագրենք, որ օր-օրի ավելի մեծ թափ հավաքող հանրային ընդվզումները աննոմալ իրավիճակ են ստեղծել Երևանի փոքր կենտրոնում: Ամենուր ոստիկանական ուժեր են, որոնք ապահովում են Վարչապետի անվտանգությունը:

Մի այլ խնդիր է արտահերթ ընտրությունների կազմակերպումը: Ոչ մի կերպ չեմ կարողանում պատկերացնել, թե Նիկոլ Փաշինյանն ինչպես է քարոզարշավ անելու: Ինչ է ամեն մարզ գնալուց հազարավոր ոստիկաննե՞ր է հետը տանելու, ինչպե՞ս է դա հնարավոր: Միգուցե տանի, բայց տեսարանն ինքնին արդեն հակաքաղաքական է, մարդկանց ջղայնացնող: Մի քանի նման հանդիպումներ և Նիկոլ Փաշինյանի առանց այդ էլ գահավիժած վարկանիշից ոչինչ չի մնա: Ամեն դեպքում արտահերթ խորհրդարանական ընտրությունների անցկացումը հրամայական պահանջ է դառնում: Դա նախ և առաջ պետք է մեր երկրին ու ժողովրդին: Հայաստանի զարգացումը կամ առաջընթացը հիմա ուղղակի արգելակված է, կանգնած է: Նիկոլ Փաշինյանը սա պիտի գիտակցի և ոչ միայն գիտակցի: Պատերազմում պարտված, քայքայման եզրին հասած երկիրը չի կարող նման առօրյայով երկար գոյատևել:

Անի Դանիելյան

www.1or.am 

website by Sargssyan