Նոր օրինագիծը՝ ՊՈԱԿ-ների ճահճացման երաշխիք

ՀՀ ազգային ժողովի «Իմ քայլը» խմբակցության պատգամավորներ Վարազդատ Կարապետյանը, Լիլիթ Մակունցն ու Հերիքնազ Տիգրանյանը նոր օրենքի նախագիծ են ներկայացրել, որով առաջարկում են խստացնել պետական ոչ առևտրային կազմակերպությունների տնօրենների թեկնածուներին ներկայացվող պահանջները: ԱԺ նիստում պատգամավոր Վարազդատ Կարապետյանը, ներկայացնելով օրենքի նախագիծը, նշեց, որ գործող ընթացակարգով միայն բարձրագույն կրթությունը բավարար է, որ մարդը կարողանա մասնակցել ցանկացած պետական ոչ առևտրային կազմակերպության գործադիր մարմնի ղեկավարի մրցույթին: Նոր նախագծով, սակայն առաջարկվում է պահանջներին ավելացնել նաև երկու տարվա համապատասխան մասնագիտական ստաժը, եթե օրենքով այլ բան նախատեսված չէ:

«Որոշ դեպքերում, օրինակ կրթության մասին կամ մասնագիտական կրթության մասին օրենսդրությամբ այդ ոլորտներում գործող ՊՈԱԿ-ների տնօրենների ընտրությունը կարգավորվում է այդ օրենսդրությամբ: Դրա համար սա չի վերաբերվի օրինակ դպրոցների տնօրենների ընտրությանը»,-ասել է Կարապետյանը:

Ստացվում է, որ դպրոցների տնօրեններին կշարունակեն եղած ընթացակարգերով ընտրել, իսկ այլ ՊՈԱԿ-ների դեպքում թեկնածուն պետք է ունենա երկու տարվա ստաժ, ինչը խիստ վիճահարույց կետ է, և ՊՈԱԿ-ների կառավարումը կարող է տանել ճահճացման ճանապարհով: Ամենակարևոր հարցը, որը ծագում է, թե ինչպես պետք է թեկնածուն կարողանա ունենալ երկու տարվա համապատասխան մասնագիտական ստաժ, եթե նախկինում որևէ ՊՈԱԿ չղեկավարած անձը օրենքով չի կարող մասնակցել որևէ մրցույթի: Այդ դեպքում որտեղի՞ց կարող է ստաժ ունենալ: Այս առաջարկը մոտավորապես նման է, երբ գործատուները հաճախ փնտրում են 20 տարեկան, բարձրագույն կրթությամբ, օտար լեզուների գերազանց իմացությամբ, աշխատանքային փորձ ունեցող մասնագետների, որը, համաձայնեք, աբսուրդի ժանրից է:

Հիմա ստացվում է մոտավորապես նույն աբսուրդի առջև ենք կանգնելու ՊՈԱԿ-ների տնօրենների ընտրության ժամանակ, քանի որ շուկայում առավելություն կստանան նրանք, ովքեր արդեն իսկ հնարավորություն են ունեցել նմանատիպ կառույցներ ղեկավարել: Այս դեպքում ինչպե՞ս պետք է ապահովվի սերնդափոխության և աշխատաշուկան նոր մասնագետներով համալրելու հարցերը: Թե՞ կրկին փորձ է արվում գնալ հին ու ճահճացած ճանապարհներով՝ հավելյալ արգելքներ առաջացնելով նոր ու թարմ գաղափարներ ներկայացնելու հնարավորության համար:

Արմինե Գրիգորյան

www.1or.am