Իմ՝ գործակալ լինելու թեզը սկսեցին բրդել նիկոլականները, երբ ակնհայտ դարձավ՝ ՀՀ-ն զավթվել է օտարերկրյա գործակալների կողմից, որից մեկը և գլխավորը Ն. Փաշինյանն է. Արթուր Դանիելյան (տեսանյութ)
ՀԱՍԱՐԱԿՈՒԹՅՈՒՆTert.am-ը «Ադեկվադի» կուսակցություն դառնալու, ֆինասական միջոցների, ՀՀ պաշտոնաթող նախագահ Ռոբերտ Քոչարյանի հետ հնարավոր համագործակցության, ՔՊ նախկին համակիրը լինելու մասին զրուցել է «Ադեկվադ» ՀԿ նախագահ Արթուր Դանիելյանի հետ:
-«Ադեկվադը» հայտարարել է կուսակցություն ստեղծելու մասին, կուսակցությունը կարո՞ղ է հաջողություն ունենալ, եթե այս պահին դաշտում ձեր մոտեցումներով փոքրամասնություն եք համարվում:
-Համարվում է՝ ցանկացած կուսակցություն պետք է ձգտի իշխանություն ստանալ և սեփական ծրագիրը իրագործել. ես այդ կարծիքին չեմ, 2-րդ՝ ես չեմ կարծում, որ ՀՀ-ում քաղաքական պրոցեսները ընթանալու են նախկին տրամաբանությամբ՝ ընտրություններով: Իմ կարծիքով՝ առհասարակ ժողովրդավարությունը որպես մոդել սնանկանում է, և երկրի կառավարման մոդելն է փոխվել:
Ինձ համար հաջողություն կոչեցյալը մի քիչ այլ պարադիգմի մեջ է, մենք սկզբից ստեղծեցինք ՀԿ, իր առաքելությունը նշված է փաստաթղթի մեջ, որը հետո ստացավ մանիֆեստ անվանումը, մենք համախոհներով մեզ համար ստանձնել ենք մի առաքելություն, որը վեր է քաղաքական պայքարից կամ 5 տարվա սեգմենտից, որի ընթացքում պետք է ընտրություններ տեղի ունենան, կամ ոչ, մենք ասում ենք, որ Հայաստանի, հայ մարդու, ժողովրդի մեր զարգացման տեսլականը կա, և այն պետք է տեղի ունենա, այլընտրանք գոյություն չունի:
Մենք այս աշխարհում փոքրամասնություն ենք, բայց փոքրամասնությունը պետք է լինի ճնշող կամ գոյություն չունենա, ձուլվի և անհետանա: Մենք այս առաքելությունն ենք առաջ քաշում, և մեր հաջողությունը մեծապես կախված է լինելու ոչ թե կուսակցության հաջողությունից, այլ առհասարակ նրանից, թե ինչքանով է այս առաքելությունը, որը մենք ստանձնել ենք, ընդունվել ժողովրդի կողմից:
Ճիշտ եք ասում՝ ներկա պահին ես չեմ կարող ասել, որ բնակչության մի ստվար զանգված գիտի, հասկանում է կամ սատարում է մեր գաղափարախոսությանը, բայց հենց դա է պատճառը, որ մենք որոշեցինք համախմբվել, ստեղծել ՀԿ և այդ ՀԿ-ի քաղաքական ճյուղերից մեկը հանդիսացող կուսակցություն:
-Մի կողմից ասում եք, որ քաղաքական նպատակներ չեք հետապնդում, ձեր առաքելությունը վեր է քաղաքական պայքարից, մյուս կողմից էլ խոսում եք նաև քաղաքական հետապնդումների մասին. մի փոքր անհասկանալի է:
-Ես չեմ ասել, որ քաղաքական նպատակ չենք հետապնդում, ես ասում եմ, որ ըստ իս, ժողովրդավարությունը, որպես մոդել, սնանկանում է: Քաղաքականությունը առհասարակ ֆիզիկայի, քիմիայի նման է, դու չես կարող քաղաքականությունից դուրս լինել, անկախ նրանից ինչքան քեզ ապաքաղաքական ես համարում, հնարավոր չէ, եթե դու ապրում ես սոցիումում, եթե քեզանից բացի, կա գոնե ևս մեկ մարդ քո շրջակայքում, այդ քաղաքականությունից դուրս չես կարող լինել:
Երբ որ մենք ասում ենք, որ մեզ հետապնդում են քաղաքական դրդապատճառներով, սա ընդամենը փաստի, իրողության արձանագրում է, այսինքն` կան բաներ, որ Փաշինյանի հետևորդներին կարելի է անել, իսկ Փաշինյանին ընդդիմացողներին չի կարելի անել, սա քաղաքական հետապնդում է, իրավական չէ, իրավական հետապնդման դեպքում երկու կողմերն էլ իրավաչափորեն օրենքի սահմաններում կկանչվեին պատասխանատվության: Քանի դեռ կիրառվում են երկակի ստանդարտներ, այդ հետապնդումը կոչվում է քաղաքական, սա իրենց քաղաքական որոշումն է:
-Առաջին անգամը չէ, որ բերման ենթարկվեցիք նմանատիպ գործողության համար, ստացվում է՝ տեղեկացվա՞ծ եք եղել, որ բերման կենթարկվեք, լրացուցիչ աղմուկի համար գործողություննե՞ր եք իրականացրել:
-Մեզ առաջին անգամ բերման ենթարկելիս փորձեցին մեղադրել, որ ըստ նպատակի չենք օգտագործել հանրային գույքը, այսինքն` ըստ ոստիկանության՝ հանրային գույքի վրա քաղաքական հայտարարություն փակցնելը ոչ նպատակային է, այս դեպքում հարց է առաջանում՝ բա նախկինում, որ այդ նույն բանը անում էին Նիկոլ Փաշինյանի հետևորդները, դա ասֆալտի ոչ նպատակային օգտագործում չէ՞ր, կամ ասենք, երբ որ Նիկոլը ասում է՝ փռելու եմ ասֆալտին, ասֆալտը փռվելու համար չի՞, մենք որոշեցինք Նիկոլին փռել ասֆալտին և մի քանի քաղաքական դաս տալ:
Ես վստահ էի, որ բերման ենք ենթարկվելու, որովհետև շատ հստակ ինֆորմացիա ունեի, որ գիշերը՝ ժամը 12-ից, հստակ, ուժեղացված ծառայություն են իրականացրել ոստիկանության, համայնքապետարանների, վարչական շրջանների աշխատակիցները, և հստակ հրահանգ կար թույլ չտալ այդ գրաֆիկական պատկերներն անել, արվել է, մարդկանց բերման են ենթարկել:
Սա էր հրահանգը, հրահանգի մասին հստակ գիտեի, մեր բոլոր մասնակիցները գիտեին: Մեր ակցիան շատ կարևոր նշանակություն ուներ բոլորը, ժողովուրդը պետք է հասկանա, որ մենք վճռական ենք: Կա ևս մի քանի մեսիջ, որ ի հայտ եկան ակցիայի ընթացքում. պարզ դարձավ, որ այդ բազմահազար աջակիցների մասին ասվածը միայն առասպել է: Այս պահին Նիկոլ Փաշինյանի մեջքին միայն վարչական ռեսուրս է, այսինքն` այն մարդիկ, ում ինքը գործի է նշանակել, և իրավապահ մարմիները, ընդ որում հավաստիացանում եմ ձեզ՝ իրավապահ մարմիները իր հրահանգները, մեղմ ասած, չուզենալով են կատարում:
-Ֆինանսական միջոցներ ինչպե՞ս եք ապահովելու, աղբյուրը որտեղի՞ց է: Ձեր մասին խոսելիս շատերը հաճախ «գործակալ» են անվանում, կուսակցության ֆինասական միջոցները ներսի՞ց, թե՞ դրսից եք ներգրավելու:
-Իմ՝ գործակալ լինելու թեզը սկսեցին բրդել նիկոլականները, երբ արդեն ակնհայտ դարձավ, որ այս պետությունը՝ ՀՀ-ն, զավթվել է օտարերկրյա գործակալների կողմից, որից մեկը և գլխավորը Նիկոլ Փաշինյանն է: Դա իր սիրած մեթոդն է, վերջերս էլ արցախցիներին նախապես մեղադրեց Արցախը հանձնելու մեջ կամ դատավորներին մեղադրեց դատական համակարգը ապականելու մեջ: 6 տարեկան երեխայի նման, երբ իրեն բան ես ասում, այդ շրջանակներում ինքը ասում է՝ դու ես, եթե ես գործակալ եմ, ճիշտ կլինի՝ ինձ ձերբակալեն, բոլոր ռեսուրսներն իշխանությունը ունի՝ պարզելու իմ ֆինանսական միջոցները որտեղից են գալու, որտեղ են ծախսվում, օրենքին համապատասխանում են, թե ոչ:
Ես եմ առաջինը քարոզել օտարերկրյա գործակալների մասին օրենքի ներդրումը ՀՀ-ում, այսօր էլ հայտարարություն տարածեցինք՝ սատարելով «Վետո» նախաձեռնությանը, որը նույնպես ակցիաներ է իրականացնում:
Պատճառն ինձ գործակալ անվանելու այն էր, որ Նիկոլ Փաշինյանի ուսերին ահագին բեռ կա, այդ բեռերից մեկը կոչվում է «օտարերկրյա գործակալ»:
Ես իմ անձնական ֆինասական միջոցներից եմ ֆինանսավորում այս պահին մեր գործունեությունը, բայց արդեն մոտ մեկ շաբաթ է՝ ինչ հրապարակել ենք մեր բանկային հաշիվը, բոլոր ցանկացողները կարող են իրենց նվիրատվություններով սատարել, կոչ եմ անում անհաղորդ, անմասն չմնալ:
Ես կարծում եմ՝ Հայաստանում այս պահին իրավիճակն այնքան է փոխվել, ինչ-որ բան ինձ հուշում է, որ ֆինանսական խնդիրներ չենք ունենա, որովհետև բազմաթիվ շերտեր մանրից հասկանում են՝ Հայաստանում ինչ է տեղի ունեցել և այդ Էյֆորիայից են դուրս գալիս, մեր խնդիրը հիմա այն է, որ թույլ չտանք Էյֆորիայից դուրս գալով ընկնեն ապատիայի մեջ: Նիկոլ Փաշինյանը, լինելով քաղաքական բառիկ, բաժանել է ամբոխների տեսակների մարդկանց, այդ «դոզան» ընդունելով՝ մարդիկ 5 րոպե լավ են զգացել, «դոզայի» ազդեցությունն անցել է, հիմա «լոմկա» է սկսվել:
-Պարբերաբար խոսում եք Նիկոլ Փաշինյանից, նշում եք նիկոլականները և այլն, բայց ժամանակին ՔՊ համակիր եք եղել, Նիկոլ Փաշինյանին գովերգող գրառումներ եք կատարել, այս մասին հիշում են, սոցցանցերում ձեզ էլ հիշեցնում են:
-Ժամանակին ես նույնիսկ ուզում էի, որ Նիկոլը դառնա վարչապետ, որովհետև ժամանակին Նիկոլը և այժմյան Փաշինյանը լրիվ տարբեր մարդիկ էին, համենայն դեպս հռետորական առումով: Նիկոլը ժամանակին պնդում էր, որ որևէ դրական փոփոխության հնարավոր չէ հասնել նույնիսկ իշխանափոխության դեպքում, եթե այդ փոփոխության հասնողը նախապես չունի հստակ ծրագիր, թիմ և ինստիտուցիոնալ կառույց:
Երբ որ նա դա ասում էր, ես աջակցում էի, այդ թվում՝ ֆինանսապես, որպեսզի այդ գաղափարախոսությունը կայանա, ինչ-որ ժամանակ անց ես հասկացա, որ դա Նիկոլ Փաշինյանի հերթական սուտն էր՝ ինչ-որ հավելյալ ռեսուրսներ, միջոցներ ներգրավելու համար, և հենց որ հասկացա, հեռացա և այլևս չսատարեցի Նիկոլին: Եվ կյանքը ապացուցեց, որ Նիկոլի ասածը ճիշտ էր, հնարավոր չեն դրական փոփոխություններ, եթե դու նախապես չունես քո հստակ ծրագիրը, գաղափարախոսությունը, այն կառույցը, որը քեզ թույլ կտա այս ամենը իրագործել: Իր այս տապալումն էր, որը մեկ տարվա ընթացքում ցույց տվեց բոլոր ոլորտներում առանց բացառության, վառ ապացույց էր, որ Նիկոլը ճիշտ էր, իսկ Փաշինյանը՝ սխալ: