Ինտիմ հիգիենայի կանոնները
ՀԱՍԱՐԱԿՈՒԹՅՈՒՆԿանայք հաճախ կիսվում են ձեռքերի, մազերի, դեմքի խնամքի իրենց փորձով ու գաղտնիքներով, սակայն ինտիմ հիգիենան հազվադեպ է խոսակցության թեմա դառնում: Եվ իզուր, քանի որ հիգիենայի կանոնների պահպանումը ինտիմ հատվածներում ոչ միայն մաքուր եւ խնամված լինելու համար է, այլեւ առողջական խնդիրներից խուսափելու: Ահա մի քանի պարզ կանոն.
1. Պետք է լվացվել տաք ջրով, մաքուր ձեռքերով եւ առնվազն երկու անգամ՝ առջեւի հատվածից դեպի հետանցք: Դաշտանի օրերին չի կարելի լոգանք ընդունել, լողալ ջրավազանում կամ ջրամբարում:
2. Սրբիչը պետք է մաքուր, փափուկ լինի եւ դրանից պետք է օգտվի միայն դրա տիրուհին:
3. Սեռական օրգանի հիգիենայի համար սպունգ պետք չէ: Դրանով հնարավոր է վնասել սեռական օրգանների նուրբ մաշկը:
4. Ջրի շիթն ու ձեռքերի շարժման ուղղությունն առջեւի հատվածից դեպի հետեւամաս պետք է լինի, որպեսզի հետանցքից վարակ չանցնի (ի դեպ, բնական կարիքները հոգալուց հետո զուգարանի թղթից նույն սկզբունքով պետք է օգտվել): Հեշտոցին ուժեղ շիթով ջուր չի կարելի ուղղել: Ջրի ուղիղ շիթը ոչ միայն մաքրում է պաշտպանիչ շերտը, այլեւ նպաստում է մանրէների թափանցմանը դեպի արգանդ` մեծացնելով բորբոքումների հավանականությունը:
5. Նուրբ մաշկը քերծելուց խուսափելու համար հարկավոր է լվացվելուց հետո սեռական օրգանները ոչ թե սրբել, այլ թեթեւակի չորացնել:
6. Օճառով կարելի է լվանալ միայն հեշտոցի շուրջ գտնվող մաշկը:
7. Միջադիրները հարկավոր է օրվա ընթացքում փոխել 4-5 անգամ: Եթե օգտվում եք տամպոններից, հիշեք, որ այն օրգանիզմում պետք է մնա 2-4 ժամ: Զարգացած գրեթե բոլոր երկրներում բժիշկներն առհասարակ խորհուրդ են տալիս կանոնավոր կերպով չօգտվել տամպոններից:
8. Դաշտանի օրերին ցանկալի է խուսափել սեռական մերձեցումից: Այն մեծացնում է արգանդի բորբոքման հավանականությունը, հատկապես եթե զուգընկերոջ մոտ չեն պահպանվում հիգիենայի կանոնները:
9. Պետք է հրաժարվել կամ հազվադեպ հագնել սինթետիկ կիսավարտիքներ եւ նեղ տաբատներ: Այդպիսի հագուստը մաշկին շնչելու հնարավորություն չի տալիս եւ խանգարում է օդափոխությանը, ինչն էլ բարենպաստ միջավայր է ստեղծում վնասակար մանրէների համար: Բամբակե ներքնաշորը կազատի ձեզ այդ տհաճություններից: