Կրասնոյարսկը վերածվել է Վենետիկի. քաղաքում արտակարգ դրություն է հայտարարվել ջրհեղեղի պատճառով (լուսանկարներ, տեսանյութ)

Այս հանգստյան օրերին Ռուսաստանի Դաշնության Կրասնոյարսկ քաղաքում գրանցվել են ուժեղ տեղումներ, որոնք, օդերևութաբանների կանխատեսումների համաձայն, շարունակվելու են ևս մեկ շաբաթ, գրում է bigpicture.ru-ն:

Հորդառատ անձրևը սիբիրյան այս քաղաքը վերածել է իսկական Վենետիկի, քաղաքում արտակարգ դրություն է հայտարարվել։ Քաղաքի բնակիչները սոցցանցերում հրապարակում են եղանակային այս աղետի հետևանքները ցույց տվող լուսանկարներ:

Լույս կիրակի ամբողջ գիշեր տեղացած անձրևից հետո, առավոտյան վարորդները բախվել են աղետի հետևանքներին: Առավոտյան ժամը 7-ին տագնապով փողոցներ է դուրս բերվել քաղաքի ճանապարհային անվտանգության պետական տեսչության ամբողջ անձնակազմը:

Քաղաքի երթևեկությունը կաթվածահար է եղել, որոշ ավտոմեքենաներ ամբողջությամբ ջրով են լցվել: 

Ուժեղ անձրևների հետևանքով ջրով են լցվել ոչ միայն ավտոբուսների և մեքենաների սրահները, այլև տարբեր հաստատությունների առաջին հարկերը։