ԱՄՆ ռազմածովային ուժերը նախազգուշական կրակ են բացել իրանական նավերի ուղղությամբ

Իրանական զինվորականները կրկին հայտարարել են Պարսից ծոցում ամերիկյան նավատորմի մասնակցությամբ միջադեպի մասին: Նրանք ամերիկյան նավատորմի գործողություններն անվանել են «ոչ պրոֆեսիոնալ» և «սադրիչ»: Այդ մասին ասված է Իսլամական հեղափոխոխության պահակախմբի կորպուսի հայտարարությունում, գրում է Tasnim գործակալությունը:

Սա շաբաթվա ընթացքում երկրորդ դեպքն է: Հուլիսի 25-ին հաղորդվել է, որ Պարսից ծոցի հյուսիսային հատվածում ամերիկյան Thunderbolt նավը նախազգուշական կրակ է բացել իրեն մոտեցած իրանական նավի ուղղությամբ:

Միջադեպը տեղի է ունեցել հուլիսի 28-ին ծոցի կենտրոնական հատվածում՝ իրանական նավթագազային հարթակի մոտակայքում: Ամերիկյան «Նիմից» ավիակիրը և նրան ուղեկցող հածանավը ուղղաթիռ են բաց թողել, որը մոտեցել է իրանական հրթիռային նավերին, որոնք հետևելիս են եղել ամերիկացի նավաստիների գործողություններին, իսկ այնուհետև նախազգուշական կրակ են արձակել:

Կորպուսի հայտարարությունում նշվում է, որ իրանական նավերը շարունակել են իրենց առաքելությունը տվյալ գոտում սովորական ռեժիմով՝ ուշադրություն չդարձնելով ամերիկյան ուժերի «անսովոր» քայլերին: Այնուհետև ամերիկյան նավերը հեռացել են այդ շրջանից: