Կարակասում ցուցարարները հրկիզել են Գերագույն դատարանի շենքը

Վենեսուելայի մայրաքաղաք Կարակասում բողոքի ակցիայի մասնակիցները նախօրեին Չակաոյի շրջանում հրկիզող խառնուրդով շշեր և վառոդապատիճներ են նետել Գերագույն դատարանի շենքի մոտ: Պատահարի վայրից լուսանկարներ ու տեսակադրեր են հրապարակվել Twitter-¬ում:

«ՏԱՍՍ»-ը  AFP գործակալությանը հղում անելով գրում է, որ հարձակման է ենթարկվել նաև բանկերից մեկի բաժանմունքը, որը գտնվում է շենքի առաջին հարկում: Անվտանգության ուժերին հաջողվել է բողոքավորներին ցրել արցունքաբեր գազի միջոցով, իսկ հրշեջները կարողացել են մարել կրակը: Տուժածների մասին տեղեկություններ չեն հրապարակվել:

Հիշեցնենք, որ զանգվածային բողոքի ակցիաները սկսվել են ապրիլի 4-ից։ Բողոքի ակցիաները Վենեսուելայում սկսեցին այն բանից հետո, երբ  երկրի գերագույն դատարանը որոշում կայացրեց ընդդիմադիր ազգային ասամբլեայի իշխանության սահմանափակման մասին։