«Մտքով անցնում ա, ասում ա».Սեյրան Սարոյանը՝ Սեյրան Օհանյանի հայտարարության մասին

Գեներալ, ՀՀԿ խմբակցության պատգամավոր Սեյրան Սարոյանը չի աջակցի իր մարտական ընկերոջը՝ Սեյրան Օհանյանին: Հիշեցնենք՝ նախկին պաշտպանության նախարարը նշել էր, թե չի բացառում այնպիսի քաղաքական զարգացումներ, որոնք կհանգեցնեն ֆորսմաժորային իրավիճակի։

«Ես իշխանության մեջ եմ ա՛յ մարդ, տենց բան ո՞նց կլինի, հո խայտառակչի չենք»,- Past.am-ի փոխանցմամբ՝ Ազգային ժողովում լրագրողներին ասաց Սեյրան Սարոյանը: Սարոյանի խոսքով՝ իշխանափոխություն չի լինի, քանի որ, ըստ նրա, մեր ժողովուրդը հեղափոխական չէ:

«Ինքն էլ գիտի, որ չի լինի։ Մտքով անցնում ա, ասում ա, իմ մտքով էլ ա շատ բան անցնում»,- հավելեց պատգամավորը՝ անդրադառնալով նախկին նախարար, ՕՐՕ դաշինքի անդամ Սեյրան Օհանյանի հայտարարությանը:

«Երկիր Ծիրանի» կուսակցության նախագահ Զարուհի Փոստանջյանի՝ ազգային դիմադրության ճակատ ստեղծելու կոչին էլ Սարոյանը հետևյալ կերպ արձագանքեց.«Հա, Գավրոշն ա, հեսա իշխանափոխություն կանի»։

Լևոն Փանոսյան