Աֆղանստանի մայրաքաղաքում բողոքի ցույցեր են. ընդդիմությունը ահաբեկչական պայթյունից հետո պահանջում է կառավարության հրաժարականը

Աֆղանստանի մայրաքաղաք Քաբուլում բողոքի մեծ ցույց է ընթանում առավոտից, հաղորդում է Reuters գործակալությունը։

Ակցիան կազմակերպել են երկրի ընդդիմադիր ուժերը։ Ցուցարարները պահանջում են, որպեսզի կառավարության ղեկավար Աշրաֆ Ղանին հրաժարական տա երեկվա խոշոր ահաբեկչությունից հետո։

Ոստիկանությունը փորձում է օդ կրակելու միջոցով զսպել ցուցարարներին։

Քաբուլի փողոցներ են դուրս եկել հազարից ավելի քաղաքացիներ և երթով շարժվել են դեպի Գերմանիայի դեսպանատնից ոչ հեռու գտնվող տարածքը, որտեղ երեկ տեղի է ունեցել պայթյունը։

Հիշեցնենք, որ երեկվա խոշոր ահաբեկչությունը խլել է 90-ից ավելի մարդու կյանք։