Առնվազն ինը իրանական հրթիռներ խոցել են Իսրայելի ռազմաօդային բազաները

Առնվազն ինը իրանական հրթիռներ հարվածել են իսրայելական երկու ավիաբազաների հարձակման ժամանակ, հաղորդում է ABC News-ը՝ վկայակոչելով անանուն ամերիկացի պաշտոնյային:

«Առնվազն ինը իրանական հրթիռներ ներթափանցել են իսրայելական հակաօդային պաշտպանություն և խոցել երկու իսրայելական ավիաբազաներ»,- նշում է հեռուստաալիքը։

Նշվում է, որ 5 բալիստիկ հրթիռ է հարվածել Իսրայելի Նևաթիմ ավիաբազային՝ վնասելով C-130 տրանսպորտային ինքնաթիռը, թռիչքուղին և պահեստարանները։ Չորս հրթիռ հարվածել է Նեգև անապատում գտնվող իսրայելական ավիաբազային, սակայն զգալի վնասներ չեն գրանցվել։

Իրանի պետական ​​Press TV հեռուստաալիքը նախօրեին հայտարարել էր, որ Իրանի զինված ուժերը կիրակի գիշեր Իսրայելի վրա հարձակման ժամանակ յոթ հիպերձայնային հրթիռ են արձակել, որոնցից ոչ մեկը չի որսացել իսրայելական հակաօդային պաշտպանության կողմից։