Ադրբեջանի ՊՆ-ի հաղորդագրությունը՝ դիվերսիոն փորձի մասին, սուտ է. ամբողջ տեքստը հորինվածք է. ԼՂՀ ՊԲ

Այսօր Ադրբեջանի պաշտպանության նախարարության կողմից տարածված հաղորդագրությունն առ այն, թե իբր փետրվարի 21-ի գիշերը  արցախյան ուժերը ձեռնարկել են դիվերսիոն ներթափանցման փորձ եւ կորուստներ կրելով նահանջել ելման դիրքեր, իրականությանը չի համապատասխանում: Այս մասին հաղորդագրություն է տարածել ԼՂՀ ՊԲ-ն:

Հաղորդագրության մեջ նաեւ ասվում է.

«Արցախի Հանրապետության ՊՆ մամուլի ծառայությունը հայտարարում է, որ հակառակորդ երկրի ռազմական գերատեսչության կողմից տարածված տեղեկատվության ամբողջ տեքստը հորինվածք է: Ավելին՝ նման ապատեղեկատվություն տարածելով, ադրբեջանական քարոզչամեքենան փորձում է ինչ-որ կերպ արդարացնել իր իսկ կողմից երեկ գիշեր արցախյան դիրքերի հրետանային արկակոծության փաստը, ինչի մասին այսօր ավելի վաղ տեղեկացրել էինք:

Ավելացնենք նաեւ, որ ադրբեջանական զինուժի հրետակոծության արդյունքում՝ պաշտպանության բանակը կորուստ չի ունեցել եւ շարունակում է առաջնագծում հանդես գալ պարտադրողի դիրքերից»: